বিশেষভাৱে সক্ষমসকলৰ বাবে শিল্পগ্ৰামত তিনিদিনীয়া পুতলা নিৰ্মাণৰ কৰ্মশালা আৰম্ভ
বিশেষভাবে সক্ষম ছাত্ৰ-ছাত্ৰীসকলৰ বাবে গুৱাহাটীৰ শিল্পগ্ৰামত বৃহস্পতিবাৰৰ পৰা পুতলা নিৰ্মাণৰ এখন তিনিদিনীয়া কৰ্মশালা আৰম্ভ হৈছে।
ভাৰত চৰকাৰৰ সাংস্কৃতিক মন্ত্ৰ্যালয়ৰ নৰ্থ ইষ্ট জ’ন কালচাৰেল চেন্টাৰ(এনইজেডচিচি)আৰু ব্যতিক্ৰম মাসডোৰ উদ্যোগত কৰ্মশালাখন অনুষ্ঠিত হৈছে।
শিল্পগ্ৰামত কৰ্মশালাখন ২৪ মাৰ্চলৈকে চলিব। শুকুৰবাৰৰ পৰা কৰ্মশালাখন পুৱা দহ বজাৰ পৰা পৰা দুপৰীয়া আঢ়ৈ বজালৈকে চলিব।
বৃহস্পতিবাৰে কৰ্মশালাখনৰ উদ্বোধনী অনুষ্ঠানত অংশ গ্ৰহণ কৰে এনইজেডচিচিৰ দায়িত্ববাহী জিতুল সোণোৱাল, ৰঞ্জন বিশ্বাস, ব্যতিক্ৰম মাসডোৰ সভাপতি ড০সৌমেন ভাৰতীয়া, আইআইআৰডিডিএৰ অধ্যক্ষ মনিপদ্মা বৰঠাকুৰ বাৰ্মা, জ্যোতিপ্ৰসাদ চহৰীয়া, পপি কলিতা, জুৰি কলিতা, আশ্ৰাফুল আলী আদিয়ে।
কৰ্মশালাৰ প্ৰশিক্ষক হিচাপে আছে ৰুমা বৰা, ৰূপালী দাস, শিল্পী চক্ৰৱৰ্তী, অজন্তা বৈশ্য আৰু আশিস শৰ্মা। শিশুৰ পৰা স্নাতক পৰ্যায়লৈকে ছাত্ৰ-ছাত্ৰীসকলে কৰ্মশালাখনত যোগদান কৰিছে।
ষাঠি জনৰো অধিক প্ৰশিক্ষাৰ্থীয়ে অংশগ্ৰহণ কৰা অনুষ্ঠানটোৰ নাম হৈছে উমংগ। এনইজেডচিচি ৰঞ্জন বিশ্বাসে কয়, ‘’ অসমত পুতলা, মুখা প্ৰস্তুত কৰা শিল্পৰ মৰ্যাদা বাঢ়িছে। এনেদৰে কৰ্মশালাৰ জৰিয়তে ভৱিষ্যতে প্ৰশিক্ষাৰ্থীসকলে যাতে উপযুক্ত জীৱিকাৰ পথ বিচাৰি পায় তাৰে প্ৰয়াস কৰা হৈছে। আশা কৰিছো কৰ্মশালাত শিক্ষা লৈ বিশেষভাৱে সক্ষম ছাত্ৰ-ছাত্ৰীসকলে নিজৰ ঘৰত বহি কম খৰচতে নিখুঁতভাৱে মুখা তৈয়াৰ কৰিব পাৰিব।‘’
কৰ্মশালাখনৰ অন্যতম আয়োজক ব্যতিক্ৰম মাসডোৰ সভাপতি ড. সৌমেন ভাৰতীয়াই কয়, ‘’বিশেষভাৱে সক্ষম ছাত্ৰ-ছাত্ৰীসকলক লৈ বিগত বছৰকেইটাত আমাৰ তৰফৰ পৰা ‘জব ফেয়াৰ’ অনুষ্ঠিত হৈছিল। প্ৰতিবাৰেই অন্তত: বিশেষভাৱে সক্ষম হাজাৰ সংখ্যক প্ৰাৰ্থীয়ে অংশ গ্ৰহণ কৰিছিল। এই জব ফেয়াৰৰ পৰাই বহুতে নিজৰ জীৱিকা বিচাৰি পাইছে। এনইজেডচিচিৰ সৈতে কৰা উমংগ কাৰ্যসূচীও সফল হ’ব বুলি আমাৰ বিশ্বাস।‘’
তেওঁ লগতে কয়, ‘’সুন্দৰ সুন্দৰ পুতলা, মুখাৰ আজিকালি বজাৰত দাম আছে। আমি নিশ্চিত যে এই কৰ্মশালাৰ যোগেদিও ভৱিষ্যতে ভাল ভাল শিল্পী ওলাই আহিব।‘’