কোকৰাঝাৰত বিহাৰৰ অপহৃত লোকক উদ্ধাৰ, আদিবাসী সন্ত্ৰাসবাদী সংগঠনৰ অপহৰণকাৰী সদস্যক গ্ৰেপ্তাৰ

অসম আৰক্ষীৰ বাবে উল্লেখনীয় সফলতা। আদিবাসী সন্ত্ৰাসবাদী সংগঠন নেশ্যনেল লিবাৰেশ্যন চাওতালি আৰ্মীয়ে কোকৰাঝাৰৰ পৰা অপহৰণ কৰি নিয়া বিহাৰৰ লোকজনক সোমবাৰে নিশা উদ্ধাৰ কৰে। তাৰোপৰি অপহৰণৰ লগত জড়িত থকা লোক এজনকো আৰক্ষীয়ে আটক কৰিবলৈ সক্ষম হয়।

বিহাৰৰ দাৰভাঙা জিলাৰ প্ৰয়াত দেৱনজি লাল দিওৰ পুত্ৰ শিৱাজী লাল দিওক আদিবাসী সন্ত্ৰাসবাদী সংগঠনটোৱে গোসাঁইগাঁৱৰ পৰা অপহৰণ কৰি নি এখন ভিতৰুৱা গাঁৱত আৱদ্ধ কৰি ৰাখিছিল বুলি কোকৰাঝাৰ জিলাৰ আৰক্ষী অধীক্ষক ৰাজেন সিঙে সংবাদ মাধ্যমক জনায়।

সন্ত্ৰাসবাদী সংগঠনটোৱে শিৱাজী লাল দিওক অপহৰণ কৰা বুলি লোকজনৰ ঘৰত খবৰ দিয়াত তেওঁৰ ভায়েকে গোসাঁইগাঁও আৰক্ষী থানাত ভাৰতীয় দণ্ডবিধিৰ অধীনত এটা গোচৰ ৰুজু কৰে।

গোচৰৰ পাছতে আৰক্ষীয়ে জোৰদাৰ তদন্ত আৰম্ভ কৰি বিভিন্ন শুত্ৰৰ পৰা পোৱা তথ্যৰ ভিত্তিত সোমবাৰে নিশা গুমা সংৰক্ষিত বনাঞ্চলৰ পৰা পাঁচ কিলোমনিটাৰ নিলগত অৱস্থিত সত্যপুৰ গাঁৱৰ পৰা আৰক্ষীৰ অভিযানকাৰী দলটোৱে লোকজনক উদ্ধাৰ কৰিবলৈ সক্ষম হয় বুলি আৰক্ষী অধীক্ষকগৰাকীয়ে জানিবলৈ দিয়ে।

আনহাতে ঘটনাস্থলীৰ পৰা চলেমান চৰেন (৪৭) নামৰ এজন অপহৰণকাৰীকো গ্ৰেপ্তাৰ কৰে। ইফালে ঘটনাৰ লগত জড়িত অন্য অপহৰণকাৰীসকল ঘন জংঘলৰ সুযোগ লৈ পলাই যাবলৈ সক্ষম হয়।

আৰক্ষীৰ দলটোৱে অপহৃত লোকজনক সুৰক্ষিতভাৱে গোসাঁইগাঁও আৰক্ষী থানালৈ লৈ আনি স্বাস্থ্য পৰীক্ষা সম্পন্ন কৰে।

ইফালে আটকাধীন সদস্যজনৰ পৰা আৰক্ষীয়ে বিভিন্ন মাৰানস্ত্ৰৰ লগতে আপত্তিজনক নথিপত্ৰ সংগ্ৰহ কৰা বুলি জনায়। তাৰোপৰি ঘটনাস্থলীৰ পৰা ঘন জংঘলৰ সুযোগ লৈ পলাই যাবলৈ সক্ষম হোৱা দলটোৰ সন্ধানত ইতিমধ্যে আৰক্ষীয়ে ব্যাপক অভিযান চলোৱা বুলিও জনায় আৰক্ষী অধীক্ষক ৰাজেন সিঙে।

ঘটনা সন্দৰ্ভত আৰক্ষীয়ে আটক কৰা সন্ত্ৰাসবাদী সংগঠনজনৰ পৰা অধিক তথ্য সংগ্ৰহৰ বাবে  সোধা পোচা অব্যাহত ৰাখিছে।