বীৰচা মুণ্ডাৰ সোঁৱৰণত প্ৰেক্ষাগৃহ নিৰ্মাণৰ বাবে পুঁজি প্ৰদান কৰিব ৰাজ্য চৰকাৰে : সৰ্বানন্দ সোণোৱাল
আজি ওদালগুৰি জিলাৰ খোকাবস্তিত সদৌ অসম ছাত্ৰ সন্থাৰ দ্বাৰা আয়োজিত ১৫ সংখ্যক আদিবাসী মহোৎসৱত মুখ্য মন্ত্ৰী সৰ্বানন্দ সোণোৱালে মুখ্য অতিথি হিচাপে অংশ গ্ৰহণ কৰে। মুখ্য অতিথিৰ ভাষণত মুখ্য মন্ত্ৰী গৰাকীয়ে কয় যে, ‘আদিবাসী লোকসকল ৰাজ্যখনৰ এক অমূল্য সম্পদ। ৰাজ্যখনৰ আৰ্থ-সামাজিক দিশত এই জনগোষ্ঠীটোৰ লোকসকলে যথেষ্ট বৰঙণি আগবঢ়াইছে। আদিবাসী সমাজত আছে দক্ষতা, সততা, কষ্টসহিষ্ণুতা। সেয়েহে এই জনগোষ্ঠীটোৰ সৰ্বাংগীণ বিকাশৰ বাবে ৰাজ্য চৰকাৰে বাস্তৱসন্মত পদক্ষেপ লৈ আছে আৰু ভৱিষ্যতেও এই পদক্ষেপ অব্যাহত থাকিব।‘
ভাষণৰ আৰম্ভণিতে মুখ্য মন্ত্ৰীয়ে আছাৰ প্ৰতিষ্ঠাপক সভাপতি জাষ্টিন লাক্ৰাৰ প্ৰতি গভীৰ শ্ৰদ্ধাঞ্জলি জ্ঞাপন কৰে। আদিবাসী লোকসকলৰ বহু সংখ্যক সমস্যা আছে বুলি উল্লেখ কৰি মুখ্য মন্ত্ৰী গৰাকীয়ে বৰ্তমানৰ ৰাজ্য চৰকাৰে এই সমস্যা সমূহ সমাধানৰ ওপৰত যথেষ্ট গুৰুত্ব প্ৰদান কৰাৰ লগতে এই দিশত আৰু অধিক আঁচনি হাতত লোৱা হ’ব বুলিও কয়। আজিৰ অনুষ্ঠানতে মুখ্য মন্ত্ৰী গৰাকীয়ে আছাৰ দ্বাৰা প্ৰদান কৰা স্মাৰকপত্ৰত উল্লেখ কৰা দাবী সমূহৰ ক্ষেত্ৰত সংগঠনটোৰ সৈতে আলোচনা কৰি এই সন্দৰ্ভত ইতিবাচক পদক্ষেপ লোৱা হ’ব বুলি কয়।
আদিবাসী জনগোষ্ঠীৰ প্ৰখ্যাত নেতা বীৰচা মুণ্ডাৰ সোঁৱৰণত খোকাবস্তিত এটা প্ৰেক্ষাগৃহ নিৰ্মাণৰ বাবে যাৱতীয় পুঁজি চৰকাৰে প্ৰদান কৰিব বুলি মুখ্য মন্ত্ৰী গৰাকীয়ে কোৱাৰ লগতে ইয়াৰ বাবে প্ৰয়োজনীয় ভূমি আবণ্টনৰ উদ্যোগ লোৱাৰ বাবে খাদ্য আৰু অসামৰিক যোগান বিভাগৰ মন্ত্ৰী ৰিহন দৈমাৰীক নিৰ্দেশ দিয়ে।
অনুষ্ঠানত ৰাজ্যিক মন্ত্ৰী পল্লৱ লোচন দাসে ভাষণ প্ৰসংগত প্ৰতি তিনি বা চাৰিখন চাহ বাগিচা এলেকা সামৰি ৰাজ্য চৰকাৰে একোখনকৈ হাইস্কুল স্থাপনৰ বাবে উদ্যোগ গ্ৰহণ কৰিছে বুলি কয়। লগতে তেওঁ আদিবাসী জনগোষ্ঠীৰ বসতি অঞ্চল সমূহত ৰাজ্য চৰকাৰে দক্ষাত উন্নয়ন কেন্দ্ৰ, প্ৰশাসনীয়া তথা বিভিন্ন প্ৰতিযোগিতামূলক পৰীক্ষাত অৱৰ্তীণ হ’ব পৰাকৈ প্ৰশিক্ষণ প্ৰদান, প্ৰধান মন্ত্ৰী আৱাস যোজনাৰ গৃহ প্ৰদান আৰু ‘সৌভাগ্য’ আঁচনিৰ জৰিয়তে বিজুলীৰ যোগানৰ দৰে পদক্ষেপ সমূহ গ্ৰহণ কৰিছে বুলি কয়।
আছুৰ সভাপতি প্ৰদীপ নাগে সভাপতিত্ব কৰা এই অনুষ্ঠানত ৰাজ্যসভাৰ সাংসদ শান্তিয়াজ কুজুৰ, ওদালগুৰি জিলাৰ উপায়ুক্ত দিলীপ কুমাৰ দাসকে ধৰি বহু সংখ্যক গণ্য-মান্য ব্যক্তি উপস্থিত আছিল।