বোকাখাতত ধনশিৰি নদীৰ বানে পুনৰ প্ৰাণ ল’লে এজনৰ; মৃত্যুৰ সংখ্যা দুজনলৈ বৃদ্ধি

নাগালেণ্ডৰ পৰা নামি অহা ধলে গোলাঘাটৰ সৰুপথাৰ বৰপথাৰৰ লগতে বোকাখাত মহকুমাৰ নুমলীগড়ৰ বিস্তীৰ্ণ অঞ্চল প্লাৱিত কৰাত এতিয়া বিভিষিকাময় পৰিস্থিতিৰ উদ্ভৱ হোৱাৰ সমান্তৰালকৈ ধনশিৰি নদীৰ প্ৰলয়ংকাৰী বানে পুনৰ প্ৰাণ ল’লে এজন লোকৰ।

ধনশিৰি নদীৰ জলপৃষ্ঠ অভাৱনীয় ভাৱে বৃদ্ধি পোৱাত বোকাখাত মহকুমাৰ বিভিন্ন অঞ্চলত ৰাইজৰ মাজত হাহকাৰ পৰিস্থিতিৰ উদ্ভৱ হোৱাৰ সময়তে মহকুমাটোৰ চিনাকানত পানীত পৰি পুনৰ এজন লোকৰ মৃত্যু হোৱা ঘটনাই সমগ্ৰ অঞ্চলটোতে শোকৰ ছাঁ পেলাইছে।

জানিব পৰা মতে মৃত লোকজন বোকাখাতৰ শিঙাদৰীয়া গাঁৱৰ নিবাসী নিতাৰাম দাস ৷ মৃত ব্যক্তিজন যোৱা বুধবাৰে সন্ধিয়া নামঘৰত বন্তি জ্বলাই ঘুৰি অহাৰ পৰাই নিৰুদ্দেশ হৈ আছিল৷ আজি পুৱা ধনশিৰি নদীৰ মেটেকাত লাগি থকা অৱস্থাত নিতাৰাম দাসৰ মৃতদেহ উদ্ধাৰ হয়৷

অৱশ্যে মৃত্যুৰ কাৰণ এতিয়াও জানিব পৰা হোৱা নাই যদিও পৰিয়াল কেন্দ্ৰিক সংঘাতৰ বাবেই নিতাৰাম দাসে পানীত জপিয়াই আত্মহত্যা কৰাৰ সন্দেহ প্ৰকাশ কৰিছে স্থানীয় লোকে৷ এতিয়া আৰক্ষীৰ অনুসন্ধানতহে পোহৰলৈ আহিব প্ৰকৃত সত্য।

উল্লেখযোগ্য যে নিতাৰাম দাসৰ লগতে ধনশিৰি নদীৰ বাঢ়নি বানত এতিয়ালৈকে দুজন লোকে কৰুণ মৃত্যুক সাবটিবলগীয়া হোৱাৰ উপৰি এজন লোক নিৰুদ্দেশ হৈ থকা ঘটনাই স্বাভাৱিকতে বোকাখাত মহকুমাবাসীৰ মাজত উদ্বিগ্নতা তথা শংকা বৃদ্ধি পাইছে।

ইফালে আজি পুৱাৰ পৰা বোকাখাতৰ নুমলীগড়ত ধনশিৰি নদীৰ পানী সামান্য পৰিমানে হ্ৰাস পোৱা বুলি প্ৰশাসনে জনায়।