ব্ৰহ্মপুত্ৰৰ পানী দূষিত হোৱা বিষয়টো চীনৰ সৈতে আলোচনা কৰিছে ভাৰত চৰকাৰে

এটা গুৰুত্বপূৰ্ণ অগ্ৰগতি বুলি ক’ব পৰাকৈ ব্ৰহ্মপুত্ৰৰ পানী দূষিত হোৱা বিষয়টো অৱশেষত চীনৰ সৈতে আলোচনা কৰিছে ভাৰত চৰকাৰে। আজি নতুন দিল্লীত অসমৰ মুখ্য মন্ত্ৰী সৰ্বানন্দ সোণোৱালে দিল্লীত সাংবাদিকৰ আগত এই কথা প্ৰকাশ কৰে। মুখ্য মন্ত্ৰীজনে কয়, ‘’বৈদেশিক পৰিক্ৰমা মন্ত্ৰী সুষমা স্বৰাজে বিষয়টো সন্দৰ্ভত চীনৰ সৈতে কথা পাতিছে আৰু বিষয়টো তেওঁলোকক চাবলৈ দিছে।‘’ মঙলবাৰে দেশৰ ৰাজধানীত উপস্থিত হোৱা সোণোৱালে ব্ৰহ্মপুত্ৰৰ পানী দূষিত হোৱা বিষয়টো প্ৰধান মন্ত্ৰী নৰেন্দ্ৰ মোদী, গৃহ মন্ত্ৰী ৰাজনাথ সিং আৰু বৈদেশিক পৰিক্ৰমা মন্ত্ৰী সুষমা স্বৰাজক অৱগত কৰিছিল। ‘’মোক জনোৱা হৈছে যে কেন্দ্ৰীয় চৰকাৰে ইতিপূৰ্বে বিষয়টো গুৰুত্বসহকাৰে লৈছে।‘’ সোণোৱালে কয়। মুখ্য মন্ত্ৰীজনে বুধবাৰে জলসম্পদ মন্ত্ৰীকো লগ ধৰে। মুখ্য মন্ত্ৰী সোণোৱালে কয়, ‘’অসমৰ বেলেগ বেলেগ পোন্ধৰটা স্থানৰ পৰা ব্ৰহ্মপুত্ৰৰ পানী লোৱা হৈছে। নমুনাবোৰ ইতিপূৰ্বে পৰীক্ষাৰ বাবে প্ৰেৰণ কৰা হৈছে আৰু তাৰ ফলাফল পোৱাৰ পিছতহে আমি কিবা এটা ব্যৱস্থা ল’ব পাৰিম।‘’

উল্লেখযোগ্য যে অসমৰ বাট-পথ সম্পৰ্কীয় দিশবোৰ আলোচনা কৰিবৰ বাবে আজি সোণোৱালে পথ পৰিবহণ মন্ত্ৰী নীতিন গাডকাৰিকো লগ কৰিছিল। সেই সম্পৰ্কত সোণোৱালে কয় যে কেন্দ্ৰীয় মন্ত্ৰীজন গুৱাহাটীত এটা বৃত্তপথ নিৰ্মাণৰ বাবে পুঁজি দিবলৈ সন্মত হৈছে। আনহাতে গাডকাৰিক মাজুলীৰ গৰাখহনীয়া ৰোধৰ ২৩৭ কোটিটকীয়া আঁচনিখন মুকলি কৰিবলৈ অহা ২৯ ডিচেম্বৰত অসমলৈ আমন্ত্ৰণ জনোৱাৰ কথাও কয়।