বৰাকত বান পৰিস্থিতি পৰির্দশন মন্ত্ৰী কেশৱ মহন্তৰ : যুদ্ধকালীন তৎপৰতাৰে মথাউৰি নিৰ্মাণৰ নিৰ্দেশ
বৰাক আৰু কুছিয়াৰা নদীৰ পানী বিপদ সীমাৰ ওপৰেৰে বৈ থকাত বৰাক উপত্যকাৰ বান পৰিস্থিতিৰ অৱনতি ঘটিছে। শনিবাৰৰ ৰাতিৰ পৰা বৰাক নদীৰ অন্নপূৰ্ণা ঘাটত জলস্তৰ কমিছে যদিও উপত্যকাটোৰ বান পৰিস্থিতি এতিয়াও সংকটজনক হৈয়েই আছে।
উপত্যকাটোৰ এনে পৰিস্থিতিৰ মাজতে আজি বান পৰিস্থিতিৰ পৰ্যালোচনা কৰিবলৈ শিলচৰত উপস্থিত হৈছে জলসম্পদ মন্ত্রী কেশৱ মহন্ত। তেওঁৰ সৈতে শিলচৰৰ বিধায়ক দিলীপ কুমাৰ পাল, কিশোৰ নাথ, আমিনূল হক লস্কৰ,অমৰচান্দ জৈন,আনোয়াৰ লস্কৰ সহ বিভাগীয় মুখ্য অভিযন্তা বি ৰংপি, বিশেষ কৰ্তব্যৰত বিষয়া দিবাকৰ ভট্টাচাৰ্য, কাৰ্যবাহী অভিযন্তা অছিত দেৱ সহ স্থানীয় অগপ নেতৃত্ব উপস্থিত হৈছে।
মন্ত্ৰীগৰাকীয়ে শিলচৰৰ তাৰাপুৰৰ শিৱবাৰীৰ বান্ধ, বৰখলা ,কাটিগৰা , বদৰপুৰ,হাইলাকান্দি আৰু কৰিমগঞ্জৰ বান্ধসমূহ পৰিদর্শন কৰে। তেওঁ যুদ্ধকালীন তৎপৰতাৰে ভাগি যোৱা বান্ধসমূহ মেৰামতিৰ বাবে নিৰ্দেশ দিয়ে।
বৰাকৰ বান আৰু মথাউৰিসমূহ পৰিদর্শন কৰাৰ লগতে মন্ত্ৰী মহন্তই আশ্ৰয় শিবিৰত ৰাইজৰ সৈতে কথা পাতে। তেওঁ লগতে শিবিৰ সমূহত পৰ্যাপ্ত সাহায্য সামগ্ৰী বিতৰণৰো নিৰ্দেশ দিয়ে।
উল্লেখযোগ্য যে, বানৰ কৱলত পৰি বৰাকত এই পৰ্যন্ত ছয় গৰাকী লোকৰ মৃত্যু হৈছে। বৰাকৰ লগতে উপনৈ মধূৰা, সোণাই, ধলেশ্বৰী, চিৰি, জিৰি,ডলু , জাতিঙ্গা, কাটাখাল আদি নৈৰ বাঢ়নি পানীয়ে বান পৰিস্থিতি জটিল কৰি তুলিছে।
শিলচৰৰ বৰাক নদীৰ অন্নপূৰ্ণা ঘাটত বিপদসীমা ১৯৮৩ মিটাৰলৈ বৃদ্ধি পাইছে। আজি দুপৰীয়ালৈকে নদীখনৰ পানী বিপদসীমাৰ ওপৰেৰে বৈ আছে।