মন্ত্ৰীৰ অনুপস্থিতিৰ পিছত এইবাৰ ইলে’ক্ট্ৰনিক মীডিয়াই বৰ্জন কৰিলে অসম বিধানসভা

অসম বিধানসভাত মন্ত্ৰীৰ অনুপস্থিতিৰ পিছত এইবাৰ ইলে’ক্ট্ৰনিক মীডিয়াই বিধানসভা বৰ্জন কৰাৰ অন্য এক ঘটনা সংঘটিত হৈছে।

টি ভি চেনেলসমূহে বিধানসভাৰ কাৰ্য্যসূচী সংগ্ৰহ কৰাৰ বাবে সদনত স্থাপন কৰা কেমেৰাসমূহৰ স্থান পৰিৱৰ্তন কৰিবৰ বাবে বিধানসভাৰ অধ্যক্ষ হিতেন্দ্ৰ নাথ গোস্বামীয়ে দিয়া সঘন নিৰ্দেশত সাংবাদিকসকল বিতুষ্ট হৈ আজি সদন বৰ্জন কৰে।

সোমবাৰে ৰাতিপুৱা সদন আৰম্ভ হোৱাৰ পিছতে এই ঘটনা সংঘটিত হয়।

টিভি সাংবাদিকসকলে বিধানসভা বৰ্জন কৰাৰ ফলত ৰাজ্যবাসী বিধানসভাৰ কাৰ্য্যসূচী চোৱাৰ পৰা বঞ্চিত হ’ব।

বিৰোধী দলসমূহে এই ঘটনাক দুৰ্ভাগ্যজনকৰূপে অভিহিত কৰিছে।

কংগ্ৰেছ বিধায়ক ৰেকিবুদ্দিন আহমেদে কয়, ‘এনেকুৱা ঘটনা আগতে হোৱা নাই। এই ঘটনাই বৰ্তমান চৰকাৰৰ স্বেচ্ছাচাৰী মনোভাৱ প্ৰকট কৰিলে।’

অৱশ্যে এই বিধানসভা বৰ্জন অনিৰ্দিষ্টকালীন নহয় আৰু কাইলৈ এই বৰ্জন উঠাই লোৱা হ’ব পাৰে।