মন্ত্ৰী অতুল বৰাৰ দ্বাৰা বোকাখাতত পশুধনৰ চবকা ৰোগ প্ৰতিৰোধ চিটাকৰণৰ আঁচনিৰ উদ্বোধন

বোকাখাতত অচিৰেই পশু চিকিৎসাৰ ক্ষেত্ৰ সহায়কৰ এখন বিদ্যালয় স্থাপন হব বুলি আজি ঘোষণা কৰে বিভাগটোৰ সঞ্চালক ডাঃ অনুপ দাসে ৷

অসমৰ পশুপালন ও পশু চিকিৎসা বিভাগৰ উদ্যোগত আজি বোকাখাতত পশু পালন আৰু কৃষি মন্ত্ৰী অতুল বৰাই ৰাষ্ট্ৰীয় কৃষি বিকাশ যোজনাৰ অধীনত চবকা ৰোগ প্ৰতিৰোধৰ বাবে চিটা কৰণ অভিযানৰ শুভাৰম্ভ কৰে ৷

বোকাখাত নাট্যমন্দিৰত অনুষ্ঠিত বিভাগীয় এই অনুষ্ঠানত কেবিনেট মন্ত্ৰী গৰাকীৰ উপৰিও পশু পালন ও চিকিৎসা বিভাগৰ সঞ্চালক ডাঃ অনুপ দাস, পশু চিকিৎসা মহাবিদ্যালয়ৰ সম্প্ৰসাৰণ শিক্ষা বিভাগৰ মুৰব্বী অধ্যাপক ডাঃ অতুল বৰগোহাঁই , অতিৰিক্ত উপায়ুক্ত তথা মহকুমাধিপতি ধীৰাজ দাস, বিজেপি দলৰ ৰাজ্যিক সম্পাদক দেবপ্ৰদীপ বৰা,  জিলা সভাপতি জিতেন শৰ্মা, অগপৰ বোকাখাত জিলা সংভাপতি জগত কলিতা, কেন্দ্ৰীয় কাৰ্যনিৰ্বাহক সদস্য জীৱেশ্বৰ বৰা আৰু বোকাখাতৰ পৌৰপতি চিত্ৰা কাৰ্ডং উপস্থিত থাকে  ৷

বোকাখাতৰ মহকুমাধিপতি ধীৰাজ দাসৰ পৌৰহিত্য অনুষ্ঠিত সভাখনৰ উদেশ্যবাখ্যা কৰে পশু পালন ও পশু চিকিৎসা বিভাৰ সঞ্চালক ডাঃ অমূল্য বৰাই  ৷ সঞ্চালক গৰাকীয়ে  অহা ১২ তাৰিখৰ পৰা প্ৰথম পৰ্যায়ত উজনি অসমৰ ১০ জিলাত এই চিটাকৰণ আৰম্ভ হব বুলি জনায় ৷ লগতে বোকাখাতত অচিৰেই পশু চিকিৎসাৰ ক্ষেত্ৰ সহায়কৰ এখন বিদ্যালয় স্থাপনৰ কথাও ঘোষণা কৰে ৷

মুৰব্বী অধ্যাপক ডাঃ অনুপ দাসে চবকা ৰোগ অসমৰ পৰা নিৰ্মূল কৰিব পৰাকৈ এই চিটাকৰণ অভিযান সফল কৰিবৰ বাবে সকলোকে আহ্বান জনায় ৷

অনুষ্ঠানত ভাষণ প্ৰদান কৰি মন্ত্ৰী অতুল বৰাই কয় যে পশু পালন বিভাগটো টনকিয়াল কৰিবৰ বাবে প্ৰচেষ্টা লোৱা হৈছে ৷ হুৰ পোকৰ আক্ৰমনৰ পিছতো ৰাজ্যত ধান উৎপাদন যথেষ্ট ভাল হোৱা কথাও তেওঁ কয় ৷ ইয়াৰ বাবে পশু পালন বিভাগে যথেষ্ট পদক্ষেপ হাতত লৈছিল ৷

অসম চৰকাৰে এডভান্টেজ অসমৰ পাচতে বহিঃৰাজ্যৰ পৰা উচ্চ বৰ্ণসংকৰ গৰু অনাৰ বাবে এক আঁচনি হাতত লৈছে ৷

অনুষ্ঠানত মন্ত্ৰী অতুল বৰাই বন্তি প্ৰজ্বলন কৰি চিটা কৰণ অভিযানৰ উদ্বোধন কৰে ৷