মহানগৰৰ যানজঁট লাঘৱৰ বাবে অসমৰ অভিযন্তাৰ দ্বাৰা বিকশিত এপ ‘পাৰ্কিং ৰাইনো’ উন্মোচন

অসমৰ দুগৰাকী যুৱ অভিযন্তাই ‘পাৰ্কিং ৰাইনো’ নামেৰে এটা নতুন ‘এপ’ বিকশিত কৰিছে। এই ‘এপ’টোৱে উত্তৰ-পূৰ্বাঞ্চলৰ বাহন পাৰ্কিঙৰ সমস্যাটো লাঘৱ কৰাত সহায় কৰিব।

এই ‘এপ’টোৱে গুৱাহাটীৰ ৰাষ্টাৰ কাষত থকা আৰু ৰাষ্টাৰ পৰা দূৰত থকা দুয়োবিধ পাৰ্কিং স্থানৰ ব্যৱস্থাপনা কৰিব। গুৱাহাটীৰ বাহিৰেও এই ‘এপ’টোৱে যোৰহাট, তিনিচুকীয়া, ডিব্ৰুগড় আৰু তেজপুৰ চহৰকো সামৰি ল’ব আৰু চালকসকলক মুহূৰ্তৰ বাৰ্তা মুহূৰ্তে যোগান ধৰি থকিব।

অসম আভিযান্ত্ৰিক মহাবিদ্যালয়ৰ ত্ৰিদীব কোঁৱৰ আৰু মৃগাংক ডেকাই যোৱা বছৰ ‘ধাৰণা গঠন’ কাৰ্যসূচীৰ অন্তৰ্গত নুমলীগড় শোধনাগাৰ লিমিটেডৰ পৰা ‘বীজ পূঁজি’ (অংশদাৰিত্বৰ চৰ্তত লাভ কৰা কৰা বিনিয়োগ) লাভ কৰিছিল আৰু তেওঁলোকে তেওঁলোকৰ কাৰ্যসূচী গুৱাহাটীত আৰম্ভ কৰিবলৈ সক্ষম হৈছে।

বৰ্তমান এই ‘এপ’টো ভাৰতৰ ১৫খন আৰু ফিলিপাইনছৰ দুখন মহানগৰত কাৰ্যক্ষম হৈ আছে আৰু ভৱিষ্যতে ইয়াক দক্ষিণ পূব এছিয়াৰ আৰু কেইখনমান দেশত চলোৱাৰ পৰিকল্পনা আছে বুলি জানিব পৰা গৈছে।

‘পাৰ্কিং ৰাইনো’ৱে পৰৱৰ্তী কেইটামান মাহৰ ভিতৰতে গুৱাহাটী-শ্বিলং পথ আৰু জু ৰোডত অৱস্থিত গুৱাহাটী পৌৰ নিগমৰ অন্তৰ্গত ৫০ৰো  অধিক পাৰ্কিং স্থান সামৰি লোৱাৰ সম্ভাৱনা আছে। ফাইনেঞ্চিয়েল এক্সপ্ৰেছৰ দ্বাৰা প্ৰকাশিত এটা বাতৰিত প্ৰকাশ যে বাংগালুৰুত শোচনীয় পাৰ্কিং ব্যৱস্থাৰ পৰা লাভ কৰা অসুবিধাৰ কবলত পৰি ‘এপ’টো বিকশিত কৰাৰ কথা মনলৈ আহিছিল অভিযন্তাদ্বয়ৰ।

অসমৰ নুমলীগড় শোধনাগাৰ লিমিটেডে  নতুন উদ্যোগক উৎসাহিত কৰাৰ বাবে আৰম্ভ কৰা ‘ধাৰণা গঠন’ কাৰ্যসূচীত ‘পাৰ্কিং ৰাইনো’কে ধৰি আন দুটা প্ৰকল্পও বাস্তৱায়িত কৰাৰ বাবে কোম্পানীটোৰ পৰা পুঁজি লাভ কৰিছিল।