বন্যপ্ৰাণীৰ হত্যা আৰু ব্যৱসায় ৰোধৰ উদ্দেশ্যে গোলাঘাটত ন্যায়িক বিষয়াৰ বিশেষ কৰ্মশালা

অসমত ক্ৰমবৰ্ধমান বন্যপ্ৰাণীৰ ব্যাপক হত্যা, বন্যপ্ৰাণী আৰু ইয়াৰ অংগ-প্রত্যগক কেন্দ্ৰ কৰি গঢ় লৈ উঠা বৃহৎ ব্যৱসায়ীক চক্ৰসমূহ ৰোধ কৰাৰ উদ্দেশ্যে আজি দিনজোৰা কাৰ্যসূচীৰে গোলাঘাটত সাতখন জিলাৰ ন্যায়িক বিষয়াসকলৰ এক কৰ্মশালা সম্পন্ন হয়।

অসম আইন সেৱা প্ৰাধিকাৰী আৰু স্বেচ্ছাসেৱী সংগঠন আৰণ্যকৰ উদ্যোগত গোলাঘাট জিলা আইন সেৱা প্ৰাধিকৰণে বগৰিজেংস্থিত সতী সাধনী কলা ক্ষেত্ৰত আয়োজন কৰা উক্ত কৰ্মশালাত গোলাঘাট জিলাৰ লগতে যোৰহাট, শিৱসাগৰ, ডিব্রুগড়,তিনিচুকীয়া, উত্তৰ লখিমপুৰ আৰু শোণিতপুৰ জিলাৰ ন্যায়িক বিষয়াসকলে অংশগ্ৰহণ কৰে।

উক্ত কৰ্মশালাত সমল ব্যক্তি হিচাপে অংশ গ্ৰহণ কৰি গুৱাহাটী উচ্চ ন্যায়ালয়ৰ ন্যায়াধীশ এ এম বুজৰবৰুৱাই উক্ত কৰ্মশালাৰ জৰিয়তে ন্যায়িক বিষয়াসকলে বন্যপ্ৰাণী সংক্ৰান্তীয় গোচৰৰ বিচাৰ প্ৰক্ৰিয়াত সন্মুখীন হৈ অহা সমস্যাসমূহ সমাধানৰ ক্ষেত্ৰত কিছু পৰিমাণে উপকৃত হ’ব বুলি মন্তব্য কৰে।

তেওঁ লগতে এনে গোচৰৰ ক্ষেত্ৰত আৰক্ষীৰ ভূমিকাৰ কথা উল্লেখ কৰি আৰক্ষীৰ সবল, শক্তিশালী ভূমিকাৰ বাবে ৰাজ্য চৰকাৰে আইন-শৃংখলা আৰু অপৰাধ অনুসন্ধান পৃথক কৰাৰ প্ৰয়োজন আছে বুলি কয়।

একেদৰে আন গৰাকী সমল ব্যক্তি তথা গুৱাহাটী উচ্চ ন্যায়ালয়ৰ ন্যায়াধীশ এন কতেশ্বৰ সিঙে বন্যপ্ৰাণী সংক্ৰান্তীয় অপৰাধ ৰোধৰ বাবে অধিবক্তা, ন্যায়িক বিষয়াসকলৰ লগতে বিভিন্ন তদন্তকাৰী সন্থা, সংগঠন সমূহকলৈ এক পৰিকাঠামো তৈয়াৰ কৰাৰ পোষকতা কৰে।

আনহাতে স্বেচ্ছাসেৱী সন্থা আৰণ্যকৰ তৰফৰ পৰা সম্পাদক তথা মুখ্য কাৰ্যবাহী বিষয়া বিভৱ কুমাৰ তালুকদাৰে বক্তব্য ৰাখি বৰ্তমান সময়ত বন্যপ্ৰাণীৰ ব্যৱসায় বিশ্বৰ অন্যতম বৃহৎ অবৈধ বাণিজ্যত পৰিগণিত হোৱা বুলি উল্লেখ কৰি উক্ত কৰ্মশালাৰ জৰিয়তে স্থানীয়, ৰাষ্ট্ৰীয় আৰু আন্তঃৰাষ্ট্ৰীয় ক্ষেত্ৰত চলি থকা এই ব্যৱসায় আৰু ইয়াৰ ধাৰা অসমৰ ন্যায়িক বিষয়া সকলৰ আগত দাঙি ধৰাৰ চেষ্টা চলাইছে বুলি কয়।

উল্লেখযোগ্য যে গোলাঘাটত পোন প্ৰথমবাৰৰ বাবে আয়োজন কৰা উক্ত কৰ্মশালাৰ পিছতে অহা ২ নৱেম্বৰত গুৱাহাটীত দ্বিতীয়খন কৰ্মশালা আয়োজন কৰিব বুলি তেওঁ জানিবলৈ দিছে।

উক্ত কৰ্মশালাত অসম ৰাজ্যিক আইন সেৱা প্ৰাধিকাৰীৰ  সদস্য সচিব সত্যনাথ শৰ্মা, গোলাঘাট জিলা আইন সেৱা প্ৰাধিকাৰীৰ অধ্যক্ষ সত্যজিৎ খাউণ্ড, ইণ্টাৰনেশনেল ৰাইন’ ফাউণ্ডেশ্যনৰ ৰাহুল দত্ত আদি উপস্থিত থাকে।