মাজুলীত ৯ এপ্ৰিলত মহিলাৰ ‘সজাগতা আৰু কৰ্মদক্ষতা সহায়িকা সমাৰোহ’; উপস্থিত থাকিব মুখ্য মন্ত্ৰী

মাজুলীত অহা ৯ এপ্ৰিল সোমবাৰে দিনৰ ১০ বজাৰ পৰা জিলাখনৰ মহিলাসকলৰ বাবে অনুষ্ঠিত হ’ব ‘সজাগতা আৰু কৰ্মদক্ষতা সহায়িকা সমাৰোহ’ শীৰ্ষক এক আলোচনা চক্ৰ। কৰতিপাৰ উচ্চ মাধ্যমিক বিদ্যালয়ৰ খেল পথাৰত অনুষ্ঠিত হ’ব লগা আলোচনা চক্ৰখনত উপস্থিত থাকিব মুখ্যমন্ত্ৰী তথা মাজুলীৰ বিধায়ক সৰ্বানন্দ সোণোৱাল।

মাজুলী জিলা প্ৰশাসনৰ সহযোগিতাত অসম চৰকাৰৰ সমাজ কল্যাণ বিভাগ আৰু অসম ৰাজ্যিক সমাজ কল্যাণ পৰিষদে যুটীয়াভাৱে দিনজোৰাকৈ হ’ব লগা আলোচনা চক্ৰখন আয়োজন কৰিছে।

চৰকাৰৰ বিভিন্ন বিভাগৰ আঁচনিসমূহৰ বিষয়ে মহিলাসকলক অৱগত কৰোৱাৰ লগতে এই আঁচনিবোৰৰদ্বাৰা মহিলাসকল কিদৰে অধিক নিপুণ, দক্ষ তথা স্ব-নিৰ্ভৰশীল হৈ উঠিব পাৰে সেই বিষয়ে আলোচনা চক্ৰখনত জনোৱা হ’ব।

এইলৈ সমাজ কল্যাণ বিভাগ, ৰাজ্যিক সমাজ কল্যাণ পৰিষদ আৰু মাজুলী জিলা প্ৰশাসনে যৌথ প্ৰস্তুতি আৰম্ভ কৰিছে। যোৱা ৫ এপ্ৰিল বৃহস্পতিবাৰ মাজুলীৰ উপায়ুক্ত কাৰ্যালয়ত অসম ৰাজ্যিক সমাজ কল্যাণ পৰিষদৰ অধ্যক্ষা কৃষ্ণা দাসে উপায়ুক্ত দেৱপ্ৰসাদ মিশ্ৰৰ লগতে জিলা প্ৰশাসনৰ শীৰ্ষ বিষয়াসকলৰ সৈতে এখন বৈঠকত মিলিত হৈ প্ৰস্তুতি পৰ্বৰ লগত জড়িত দিশসমূহৰ পৰ্য্যালোচনা কৰে।