ৰহস্যজনক হত্যাকাণ্ডক লৈ সত্ৰনগৰী মাজুলীত তীব্ৰ চাঞ্চল্য

মাজুলীৰ খাৰকাটি গাঁৱত সংঘটিত এক ৰহস্যজনক হত্যাকাণ্ডই জোকাৰি গৈছে সমগ্ৰ অঞ্চলটো । গাঁৱৰে এজন লোকক কোনো দুৰ্বৃত্তই হানি- খুঁচি হত্যা কৰা ঘটনাই চাঞ্চল্যৰ সৃষ্টি কৰিছে মাজুলীত।

ঘটনাৰ বিৱৰণী মতে যোৱা নিশা মাজুলীৰ খাৰকাটি গাঁৱৰ সোমেশ্বৰ ভৰালী নামৰ লোকজন ভাওনা চাবলৈ গৈছিল ওচৰৰে পহুমৰা কলিতা গাঁৱত। পুৱালৈকে ঘৰলৈ উভতি নহাত ঘৰৰ লোকে বিচাৰ- খোচাৰ কৰাত গাঁৱৰে এঘৰৰ সন্মুখত সোমেশ্বৰ ভৰালীৰ মটৰচাইকেলখন দেখা পায়। তাৰ পাছত স্থানীয় লোকে গোটেই অঞ্চলটোত বিচাৰ কৰাত গাঁৱৰে এটা পুখুৰীত সোণেশ্বৰ ভৰালীৰ মৃতদেহ ওপঙি থকা দেখা পাই পাৰলৈ উঠাই আনে।

শৰীৰৰ বিভিন্ন অংশত পচাৰে খুঁচি হত্যা কৰাৰ চিন স্পষ্ট হৈ আছে মৃতদেহটোত। আনহাতে জেংৰাইমুখ থানাৰ আৰক্ষী ঘটনাস্থলীত উপস্থিত হৈ তদন্ত অব্যাহত ৰাখিছে। ঘটনাস্থলীৰ পৰা এডাল পচা উদ্ধাৰ কৰিছে আৰক্ষীয়ে। লোকজনক কোনোৱে হত্যা কৰি পুখুৰীত পেলাই দিয়াৰ সন্দেহ কৰিছে স্থানীয় লোকে।

এই ঘটনাই সত্ৰনগৰী মাজুলীত চাঞ্চল্যৰ সৃষ্টি কৰিছে। কনমানি দুটি সন্তান আৰু পত্নীক এৰি থৈ গৈছে ২৭ বছৰীয়া ভৰালীয়ে। আৰক্ষীৰ তদন্তত ঘটনাটোৰ প্ৰকৃত ৰহস্য প্ৰকাশ পাব বুলি আশা কৰা হৈছে।