মাজুলী জিলা কোষাগাৰৰ নতুনকৈ নিৰ্মিত কাৰ্যালয় ভৱন উদ্বোধন মুখ্য মন্ত্ৰীৰ
মুখ্য মন্ত্ৰী সৰ্বানন্দ সোণোৱালে আজি মাজুলী জিলা কোষাগাৰৰ নতুনকৈ নিৰ্মিত কাৰ্যালয় ভৱন উদ্বোধন কৰে।
মুখ্য মন্ত্ৰীয়ে ঘোষণা কৰে যে মাজুলীৰ উপায়ুক্তৰ কাৰ্যালয়কে ধৰি সকলো বিভাগীয় মুৰব্বীৰ কাৰ্যালয় একে চৌহদতে নিৰ্মাণ কৰিবৰ বাবে সংহত কাৰ্যালয় চৌহদ প্ৰকল্পৰ আধাৰশিলা অতি শীঘ্ৰে স্থাপন কৰা হ’ব। ইয়াৰ বাবে ৫০ কোটি টকা প্ৰাৰম্ভিক পুঁজি হিচাপে ৰাজ্য চৰকাৰে ইতিমধ্যে মুকলি কৰি দিছে বুলিও মুখ্য মন্ত্ৰীয়ে জানিবলৈ দিয়ে।
ৰাজ্য চৰকাৰৰ সূত্ৰ অনুসৰি এই নতুন ভৱনটো নিৰ্মাণত ৯১.৪৮ লাখ টকা ব্যয় হয়। ১৯৮৩ চনত স্থাপিত মাজুলী কোষাগাৰক ৰাজ্য চৰকাৰে যোৱা বছৰ ১ এপ্ৰিলৰ পৰা জিলা কোষাগাৰলৈ উন্নীত কৰিছিল।
মাজুলীৰ জিলা সদৰ গড়মুৰত উপায়ুক্তৰ কাৰ্যালয় চৌহদতে এই কোষাগাৰটো নিৰ্মাণ কৰা হৈছে।
অনুষ্ঠানটোত দিয়া ভাষণত মুখ্য মন্ত্ৰীয়ে দাবী কৰে যে, ‘সুবিশাল নদীদ্বীপ মাজুলী এতিয়া দেশ-বিদেশ সকলোতে সু-পৰিচিত নাম’।
মাজুলীক দেশৰ ভিতৰতে আগশাৰীৰ জিলা হিচাপে সৰ্বাংগ সুন্দৰ কৰি তুলিবলৈ ৰাজ্য চৰকাৰে সকলো প্ৰয়াস আৰম্ভ কৰিছে বুলি উল্লেখ কৰি মুখ্য মন্ত্ৰীয়ে কয় ‘মাজুলীত বৰ্তমান ৬০০ কোটিতকৈও অধিক টকাৰ আঁচনি ৰূপায়ণৰ প্ৰক্ৰিয়া অব্যাহত আছে’।
মুখ্য মন্ত্ৰীয়ে কয় যে মাজুলীক দেশৰ ভিতৰতে প্ৰথমখন কাৰ্বন প্ৰশমিত জিলা হিচাপে গঢ়ি তোলাৰ লক্ষ্য স্থিৰ কৰা হৈছে।