মিষ্টাৰ মডেল অব দা ৱৰ্ল্ডত অংশ গ্ৰহণৰ বাবে সাজু দীপাংকৰ তালুকদাৰ
মাৰ্চৰ প্ৰথম সপ্তাহত বাংগালুৰুত অনুষ্ঠিত ফাইনেল অনুষ্ঠানত দীপাংকৰ তালুকদাৰে মিষ্টাৰ ইণ্ডিয়া ২০১৮ৰ খিতাপ জয় কৰে। এইবাৰ ম্যানমাৰৰ য়াংগুনত অহা ২০ এপ্ৰিলৰ পৰা ২৮ এপ্ৰিললৈকে অনুষ্ঠিত হ’বলগীয়া মিষ্টাৰ মডেল অব্ দ্য ৱৰ্ল্ড প্ৰতিযোগিতাত ভাৰতক প্ৰতিনিধিত্ব কৰিব তালুকদাৰে।
এই সন্দৰ্ভত দীপাংকৰে নৰ্থ ইষ্ট নাওক কয় ‘মই আপোনালাকক জনাবলৈ পাই অত্যন্ত সুখী যে ম্যানমাৰত অনুষ্ঠিত হ’বলগীয়া মিষ্টাৰ মডেল অব্ দ্য ৱৰ্ল্ড প্ৰতিযোগিতাত অংশগ্ৰহণ কৰিবলৈ গৈ আছোঁ, য’ত ২৫খন দেশৰ প্ৰতিযোগীয়ে ভাগ ল’ব। মই আপোনালাকৰ পৰা মৰম তথা আশীৰ্বাদ বিচাৰোঁ আৰু আশাকৰোঁ যে মই এই খিতাপ ভাৰতলৈ লৈ আহিব পাৰিম।’
মাৰ্চৰ প্ৰথম সপ্তাহত বাংগালুৰুত ৩০গৰাকী চূড়ান্ত অংশগ্ৰহণকাৰীৰ শীৰ্ষত থাকি দীপাংকৰে খিতাপ দখল কৰিবলৈ সক্ষম হয়। প্ৰতিযোগিতাৰ অনুষ্ঠান পৰিচালনা কৰিছিল অক্ষয় ৰায়চুৰকাৰে, লগতে বহু আন্তৰ্জাতিক সৌন্দৰ্য প্ৰতিযোগিতাৰ পৰিচালকজনে তেওঁৰ কাষত থকা বহু মডেলক গ্ৰুম কৰিছিল।
আনহাতে দীপাংকৰক কৰিঅ’গ্ৰাফীৰ প্ৰশিক্ষণ দিয়া কৰিঅ’গ্ৰাফাৰ উদয় শংকৰে নৰ্থ ইষ্ট নাওক কয় ‘আমি টেলেণ্ট ৰাউণ্ডৰ ক্ষেত্ৰৰ লগতে মিউজিকেল ৰাউণ্ডত দীপাংকৰৰ বাবে যিখিনি কৰিবলগীয়া আছে সেইখিনি কৰিছো। আমাৰ আশা আছে তেওঁ এই প্ৰতিযোগিতাখনিত যোগদান কৰি অসমৰ লগতে সমগ্ৰ ভাৰতলৈ গৌৰৱ কঢ়িয়াই আনিবলৈ সক্ষম হ’ব।‘
তদুপৰি দীপাংকৰৰ শৰীৰ চৰ্চাৰ প্ৰশিক্ষকৰ দ্বায়িত্বত থকা কৌশিক ভূঞাই নৰ্থ ইষ্ট নাওক জনাই যে তেওঁ দীপাংকৰক এবছৰ ধৰি শৰীৰটোক সঠিক ৰূপত গঢ় দিয়াৰ বাবে প্ৰশিক্ষণ দি আহিছে। যিটো প্ৰতিযোগিতাত দীপাংকৰে অংশগ্ৰহণ কৰিবৰ বাবে যাব সেই প্ৰতিযোগিতাৰ বাবে শাৰিৰীকভাৱে সুন্দৰ দেখাটো খুবেই প্ৰয়োজনীয়। লগতে তেওঁ দীপাংকৰে ভাৰতলৈ বিজয়ৰ মুকুট কঢ়িয়াই আনিবলৈ সক্ষম হ’ব বুলি আশা কৰে।
মেকানিকেল ইঞ্জিনিয়াৰ দীপাংকৰ তালুকদাৰ ২০১৫ চনৰে পৰা মডেলিঙৰ পেছাত আছে। দীপাংকৰে ৰয়েল স্কুল অব ইঞ্জিনিয়াৰিং এণ্ড টেকন’ল’জিৰ পৰা অভিযান্ত্ৰিক বিষয়ত শিক্ষা লাভ কৰি সুখ্যাতিৰে প্ৰথম বিভাগত উত্তীৰ্ণ হ’বলৈ সক্ষম হৈছিল।
শৰীৰ আৰু গঠনৰ প্ৰতিযোগিতা (ফটো শ্বুট আৰু ছুইমৱেৰৰ ৰেম্প), সংস্কৃতি আৰু ঐতিহ্য (ৰাষ্ট্ৰীয় পোছাক প্ৰতিযোগিতা, পৰম্পৰাগত পোছাকৰ ফেশ্বন শ্ব’, অকচন শ্ব’, ম্যানমাৰ ডিজাইনাৰ নাইট), পৰ্যটন (ম্যানমাৰৰ প্ৰাচীন চহৰ ভ্ৰমণ ইত্যাদি)এই মি মডেল অব দা ৱৰ্লড ২০১৮ ত সামৰি লোৱা হৈছে বুলি দীপাংকৰে জানিবলৈ দিয়ে।