লোকালয়ৰ পৰা বহু নিলগত হ’ব গোৱালপাৰাৰ সন্ত্ৰাস ‘লাডেন’ৰ নতুন ঠিকনা

১৭ জন মানুহৰ প্ৰাণ লৈ গোৱালপাৰাত সন্ত্ৰাসৰ সৃষ্টি কৰা লাডেন নামৰ মখনা হাতীটোক লোকালয়ৰ বহু দূৰৰ অৰণ্যলৈ স্থানান্তৰিত কৰাৰ সিদ্ধান্ত গ্ৰহণ কৰা হৈছে।

আজি গুৱাহাটীত বন বিষয়া আৰু হাতী বিশেষজ্ঞসকলৰ মাজত অনুষ্ঠিত হোৱা এখন গুৰুত্বপূৰ্ণ বৈঠকত এই সিদ্ধান্ত গ্ৰহণ কৰা হৈছে। এই বৈঠকত লাডেনৰ বৰ্তমানৰ এলেকাটোত তাৰ  চলাচলৰ পুংখানুপুংখ বিশ্লেষণ আৰু স্থানান্তৰিত কৰিবলগীয়া এলেকাটো পৰিদৰ্শন কৰাৰ পাছতহে তাক উক্ত স্থানলৈ স্থানান্তৰিত কৰা হ’ব।

উল্লেখ্য যে অকলশৰীয়াভাৱে ঘূৰা-ফিৰা কৰা লাডেনে গোৱালপাৰাৰ প্ৰায় ৩০০ বৰ্গ কিঃ মিঃ এলেকাত সন্ত্ৰাসৰ সৃষ্টি কৰি আহিছে।

আজিৰ বৈঠকত লাডেনক স্থানান্তৰ কৰাৰ উপৰি  খানাপাৰা পশু চিকিৎসা মহাবিদ্যালয়ৰ শল্য আৰু ৰেডিঅ’লজি বিভাগৰ মুৰব্বী অধ্যাপক ড০ কে কে শৰ্মাই আক্ৰমণ-প্ৰতিৰোধী স্কোৱাড আৰু বন বিষয়াসকলৰ সামৰ্থ্য বৃদ্ধিৰ ক্ষেত্ৰত স্থানীয় লোকসকলক জড়িত কৰোৱাৰ ওপৰত জোৰ দিয়ে।

হাতী বিশেষজ্ঞ কৌশিক বৰুৱাই হাতীৰ এটা পালক প্ৰশিক্ষণ দি এই হাতীসমূহক বিভিন্ন সংবেদনশীল স্থানসমূহত অৱস্থান কৰোৱাই হাতীৰ দ্বাৰা সংঘটিত হোৱা ধ্বংসাত্মক কাৰ্য হ্ৰাস কৰাৰ পৰামৰ্শ প্ৰদান কৰে।

গোৱালপাৰাৰ জিলা বন বিষয়া এ গোস্বামীয়ে কয় যে এই সন্দৰ্ভত মেঘালয় বন বিভাগৰ সৈতে বৈঠকত মিলিত হোৱা উচিত কাৰণ গাৰো পাহাৰৰ হাতীৰ পৰম্পৰাগত বাসতিস্থলসমূহ স্থানীয় বাসিন্দাসকলে অৱৰোধ কৰি ৰাখিছে। প্ৰধান মুখ্য বন সংৰক্ষক ডি পি বাংকোৱালে কয় যে বন্যপ্ৰাণী সুৰক্ষা আইন, ১৯৭২ৰ অধীনত উৰপদ বিলখন সংৰক্ষণ ক্ষেত্ৰ হিচাপে গঢ়ি তোলাৰ পৰামৰ্শ দিছে।

বৈঠকত ড০ কে কে শৰ্মাৰ নেতৃত্বত এটা টেকনিকেল টীম গঠন কৰাৰ সিদ্ধান্ত গ্ৰহণ কৰা হয়। এই বৈঠকতেই গোৱালপাৰাৰ জিলা বন বিষয়াৰ নেতৃত্বত এটা স্থানীয় আক্ৰমণ-প্ৰতিৰোধী গোট গঠন কৰাৰ আৰু স্থানীয় প্ৰশাসনৰ সৈতে আলোচনা আয়োজন কৰাৰ সিদ্ধান্ত গ্ৰহণ কৰা হয়।