শিক্ষাখণ্ডৰ ফোপোলা স্বৰূপ : কাছাৰ জিলাৰ চৰকাৰী বিদ্যালয়ত ছাত্ৰ-ছাত্ৰীৰ অনুপাতে নাই শিক্ষক

ৰাজ্যখনৰ শিক্ষা খণ্ডত আমূল পৰিৱৰ্তনৰ বাবে শিক্ষা মন্ত্ৰী হিমন্ত বিশ্ব শৰ্মাই বিভিন্ন আঁচিন গ্ৰহণ কৰাৰ সময়তে কাছাৰ জিলাৰ শিক্ষা খণ্ডত দেখা গৈছে ইয়াৰ বিপৰীত ছবি।

উল্লেখযোগ্য যে ৰাজ্যৰ বিভিন্ন ঠাইৰ প্ৰাথমিক, মধ্য ইংৰাজী আৰু হাইস্কুলত টেট উত্তীৰ্ণ প্ৰাৰ্থীক ছাত্ৰ-ছাত্ৰীৰ অনুপাতে শিক্ষক-শিক্ষয়িত্ৰীক নিযুক্তি দিছে যদিও একাংশ বিদ্যালয়ত বৰ্তমানো ছাত্ৰ-ছাত্ৰীৰ অনুপাতে শিক্ষক-শিক্ষয়িত্ৰীৰ অভাৱতে চলি আছে বুলি জানিব পৰা গৈছে।

প্ৰাপ্ত তথ্য মতে কাছাৰ জিলাৰ উধাৰবন্দ শিক্ষা খণ্ডৰ অধীনত আৰকাটিপুৰ চৰকাৰী উচ্চ বুনিয়াদী বিদ্যালয়ত ছাত্ৰ-ছাত্ৰীৰ অনুপাতে শিক্ষক-শিক্ষয়িত্ৰী নথকাৰ ফলত বিদ্যালয়খনৰ ছাত্ৰ-ছাত্ৰী সকল ব্যাপক সমস্যাৰ সন্মুখীন হৈছে।

শুকুৰবাৰে বিদ্যালয়খনৰ পৰিচালন সমিতিৰ সভাপতি নঈম উদ্দীন লস্কৰ আৰু সদস্যই নৰ্থ ইষ্ট নাওক কয় যে ১৯৬০ চনতে প্ৰতিষ্ঠিত হোৱা ঐতিহ্যমণ্ডিত বিদ্যালয়খনত শিক্ষক-শিক্ষয়িত্ৰীৰ অভাৱৰ বাবে বিদ্যালয়খনৰ ছাত্ৰ-ছাত্ৰীয়ে প্ৰকৃত শিক্ষা লাভৰ পৰা বঞ্চিত হৈছে।

তেওঁলোকে প্ৰকাশ কৰা মতে স্কুলখনৰ ষষ্ঠ শ্ৰেণীত ছাত্ৰ-ছাত্ৰীৰ সংখ্যা ১৯২ জন, সপ্তম শ্ৰেণীত ১২৪ জন আৰু অষ্টম শ্ৰেণীত ১৪৯ জন ছাত্ৰ-ছাত্ৰী থকাৰ বিপৰীতে শিক্ষকৰ সংখ্যা মাত্ৰ ৬ জন।

লগতে লস্কৰে উধাৰবন্দ সমষ্টিৰ ৰংপুৰ, মাঝাৰগ্ৰাম, গোহাঁইপুৰ, কাশীপুৰ, মধুৰা আদি গাওঁ‌ পঞ্চায়তৰ কেইবা শ’ ছাত্ৰ-ছাত্ৰীৰ একমাত্ৰ শিক্ষা প্ৰতিষ্ঠানখনত অতি শীঘ্ৰে শিক্ষা বিভাগক শিক্ষক নিযুক্তি দি ছাত্ৰ-ছাত্ৰী সকলৰ ভৱিষ্যৎ ৰক্ষা কৰিবলৈ অহ্বান জনায়।