শিলাদিত্য দেবক ‘চালানী মাছ’ আখ্যা বদৰুদ্দিনৰ; নগাৱঁত এজাহাৰ বিধায়কজনৰ বিৰুদ্ধে
এন আৰ চিৰ চূড়ান্ত খচৰা প্ৰকাশৰ আগৰ পৰা এতিয়ালৈকে ধাৰাবাহিকভাৱে সাম্প্ৰদায়িক উচটনিমূলক মন্তব্য কৰি অহা বিজেপিৰ বিধায়ক শিলাদিত্য দেৱৰ বিৰুদ্ধে আজি নগাৱঁত এজন ব্যক্তিয়ে এখন এজাহাৰ দাখিল কৰিছে। এজাহাৰখনত অভিযোগ কৰামতে, এন আৰ চিৰ চূড়ান্ত খচৰা প্ৰকাশৰ পিছত বিধায়কজনে উচটনিমূলক সাম্প্ৰদায়িক মন্তব্য দি আহিছে। গতিকে তেওঁক গ্ৰেপ্তাৰ কৰিব লাগে।
নগাৱঁৰ ইচলামপট্টীৰ আব্দুল জলিল আকন্দ নামৰ এজন ব্যক্তিয়ে এই এজাহাৰ দিয়া বুলি নগাওঁ আৰক্ষীৰ সূত্ৰই নৰ্থ-ইষ্ট নাওক জানিবলৈ দিয়ে।
আনহাতে আজি ধুবুৰীত জমিয়ত উলেমাই পতা এন আৰ চি সম্পৰ্কীয় এখন সজাগতা সভাত অসম ৰাজ্যিক জমিয়ত উলেমাৰ সভাপতি সাংসদ বদৰুদ্দিন আজমলে বিধায়ক শিলাদিত্য দেবক ‘চালানী মাছ’ আখ্যা দিয়ে।
“তেওঁ হিন্দু সকলৰ ভোট পাবৰ বাবে এইবোৰ মন্তব্য কৰি আছে। তেওঁ আমাৰ দৰে ল’কেল নহয়। তেওঁ চালানী মাছ।” সাংবাদিকৰ এটা প্ৰশ্নৰ উত্তৰ দি এ আই য়ু ডি এফৰ সভাপতি তথা সংসদজনে কয়।
উল্লেখযোগ্য যে বিধায়ক শিলাদিত্য দেৱে কালি অতি সাম্প্ৰদায়িক মন্তব্যৰে এইখন কেইবছৰ মানৰ পিছত শংকৰ-আজানৰ দেশ গুচি আজমল-আজানৰ দেশ হ’ব বুলি বিতৰ্কিত মন্তব্য কৰিছিল। এই সন্দৰ্ভত সাংবাদিকে সোধা প্ৰশ্নৰ উত্তৰত আজমলে আজি এইদৰে বিধায়কজনক চালানী মাছ আখ্যা দিয়ে।