শিৱসাগৰৰ গড়গাঁও বিদ্যুৎ সংমণ্ডলত বাঁহৰ খুঁটাৰ ওপৰেৰে বিপজ্জনকভাৱে টনা হৈছে বিদ্যুৎ তাঁৰ
সকলো দিশতে পৰিৱৰ্তন অনাৰ প্ৰতিশ্ৰুতি দি শাসনৰ গাদী দখল কৰা বিজেপি চৰকাৰৰ দিনত শিৱসাগৰ জিলাৰ মেচাগড় আৰু মাদুৰি অঞ্চলত কাঠৰ খুঁটা, বাঁহৰ খুটাত বিদ্যুৎ পৰিবাহী তাঁৰ সংযোগ কৰি বিদ্যুৎ যোগান ধৰা দেখা গৈছে।
মন কৰিব লগীয়া যে শক্তি বিভাগে ৰাজ্যখনত ২৪ ঘণ্টাই বিদ্যুৎ যোগানৰ প্ৰতিশ্ৰুতি দিছিল যদিও ২৪ ঘণ্টা বিদ্যুৎ যোগানৰ পৰিৱৰ্তে বিপদজ্জনকভাৱেহে কাঠৰ খুঁটা, বাঁহৰ খুটা ব্যৱহাৰ কৰি বিদ্যুৎ যোগান দিয়াটো ৰাজ্যবাসীৰ বাবে দুৰ্ভাগ্যজনক।
তাৰোপৰি শিৱসাগৰ জিলাৰ গড়গাঁও বিদ্যুৎ সংমণ্ডলৰ অধীনৰ মেচাগড় আৰু মাদুৰি অঞ্চলৰ ট্ৰেন্সফৰ্মাৰ সমূহো হাবি-জংঘলেৰে আৱৰি ধৰাৰ লগতে বিপজ্জনকভাৱে উন্মুক্ত অৱস্থাতে ৰখা বুলি স্থানীয় লোকে জানবলৈ দিয়ে। ফলত অঞ্চলটোৰ স্থানীয় লোক সকলে কাঠৰ খুঁটা, বাঁহৰ খুঁটা ভাগি যিকোনো সময়তে ভয়ংকৰ দুৰ্ঘটনা ঘটাৰ আশংকাত ভূগিছে।
আনহাতে স্থানীয় লোকে জানিবলৈ দিয়া মতে উক্ত অঞ্চলটোৰ বাবে ঠিকাদাৰে পকী খুঁটা যোগান ধৰিছে যদিও বৰ্তমানলৈকে খুঁটা সমূহ পাৰিয়ে আছে। ইয়াৰোপৰি যিসমূহ খুঁটা যোগান ধৰা হৈছে সেই সমূহত মাজত ৰদ নথকা বুলি স্থানীয় লোকে জানিবলৈ দিয়ে। লগতে তেওঁলোকে কয় যে এই নিম্ন মানৰ খুঁটা সমূহ স্থাপন কৰিলেও কিমান দিন যাব তাত তেওঁলোকে সন্দেহ প্ৰকাশ কৰিছে।