শোণিতপুৰৰ চাৰিদুৱাৰত বনৰীয়া হাতীৰ উপদ্ৰৱ, দুটা পৰিয়ালৰ বাসগৃহ ধ্বংস
ৰাজ্যজুৰি হাতী-মানুহৰ সংঘাত অব্যাহত থকাৰ সময়তে শোণিতপুৰ জিলাৰ চাৰিদুৱাৰ অঞ্চলত বনৰীয়া হাতীৰ আক্ৰমণে লৈছে চুড়ান্ত ৰূপ। জিলাখনৰ চাৰিদুৱাৰ অঞ্চলত বিগত বহু দিন ধৰি বনৰীয়া হাতীয়ে বহুকেইখন গাঁৱত প্ৰৱেশ কৰি ৰাইজৰ নিদ্ৰা হৰণ কৰা পৰিলক্ষিত হৈছে।
জানিব পৰা মতে বৃহস্পতিবাৰে নিশা বালিপৰা সংৰক্ষীত বনাঞ্চলৰ পৰা খাদ্যৰ সন্ধানত ওলাই অহা এটা হাতীয়ে চাৰিদুৱাৰৰ মোলান গাঁৱত প্ৰৱেশ কৰে। হাতীটোৱে গাওঁখনৰ মানুৱেল তপ্ন আৰু প্ৰদিপ বিশ্বকৰ্মা নামৰ দুজন লোকৰ ঘৰত প্ৰৱেশ কৰি ভড়ালৰ ধান খাই উদং কৰাৰ লগতে বাসগৃহ লণ্ড ভণ্ড কৰে।
সঘনাই হাতীৰ আক্ৰমণৰ বলি হৈ অহা অঞ্চলবাসীয়ে শেষত মাৰ বান্ধি ওলাই আহি হাতীটো বনাঞ্চললৈ খেদি পঠিয়াবলৈ সক্ষম হয়। বন বিভাগৰ লোকে বনৰীয়া হাতীৰ সন্ত্ৰাসৰ পৰা ৰক্ষা কৰিবলৈ কোনো ধৰণৰ ব্যৱস্থা গ্ৰহণ কৰা নাই বুলি অঞ্চলবাসী ৰাইজে অভিযোগ উত্থাপন কৰে।
উল্লেখ্য যে অসমত শেহতীয়াভাৱে বনৰীয়া হাতী আৰু মানুহৰ সংঘাত ক্ৰমান্বয়ে বাঢ়ি অহা পৰিলক্ষিত হৈছে। বিশেষজ্ঞসকলৰ মতে হাতীৰ চিৰন্তন বসতিস্থানসমূহত মানুহৰ বসতি বাঢ়ি যোৱাৰ বাবেই খাদ্য আৰু বাসস্থানৰ সংকটত ভোগা হাতীয়ে মানুহৰ বাসস্থানলৈ প্ৰৱেশ কৰিবলৈ লৈছে। ফলত আৱশ্যম্ভৱীভাৱে বাঢ়ি গৈ আছে হাতী আৰু মানুহৰ সংঘাত। আৰু ইয়ে সময়ে সময়ে ভয়ংকৰ ৰূপ ধাৰণ কৰি আহিছে।