শৌলমাৰী-চাকলাত একে নিশাই সংঘটিত দুটাকৈ চুৰিকাণ্ড : লুটি নিলে লক্ষাধিক টকাৰ সা-সম্পত্তি

বঙাইগাঁও জিলাৰ কোকিলা আৰক্ষী নিৰীক্ষণ চকীৰ অন্তৰ্গত চাকলা বজাৰৰ এখন গেলামাল দোকানত শুকুৰবাৰে নিশা সংঘটিত হয় এক চুৰিকাণ্ড । জানিব পৰা মতে চাকলা বজাৰস্থিত সুৰজুত আলী নামৰ ব্যৱসায়ীজনৰ দোকানত কালি নিশা দুৰ্বৃত্তৰ দল এটাই প্ৰৱেশ কৰি নগদ ১৫-২০ হাজাৰ টকাৰ লগতে দোকানত থকা প্ৰায় ১.৫ লাখ টকাৰ সা-সম্পত্তি লুটি লৈ যায়।

উল্লেখ্য যে ব্যৱসায়ী সুৰজুতে কালি নিশা ১১ মান বজাত দোকান বন্ধ কৰি ঘৰলৈ যায়। আৰু এই সুযোগ লৈয়ে দুৰ্বৃত্তৰ দলটোৱে দোকানত প্ৰৱেশ কৰি নগদ ধনৰ লগতে লুটি লৈ যায় বৃহৎ পৰিমানৰ সা-সম্পত্তি।

আনহাতে কালি নিশা শৌলমাৰী বজাৰৰ ছবুৰ উদ্দিন নামৰ এজন লোকৰ জুৱেলাৰীতো সংঘটিত হয় অনুৰূপ চুৰিকাৰ্যৰ ঘটনা। জুৱেলাৰীখনৰ পৰা চোৰে সোনৰ চেইনসহ বহু পৰিমানৰ ৰূপৰ আ-অলংকাৰ চুৰ কৰি নিয়ে।

উল্লেখ্য যে এটা নিশাতে এক কিঃমিঃ দূৰত্বৰ ভিতৰত সংঘটিত হোৱা দুটাকৈ চুৰি কাণ্ডই কোকিলা অঞ্চলত তীব্ৰ প্ৰতিক্ৰিয়াৰ সৃষ্টি হৈছে। আৰু এই দুটাকৈ চুৰিকাণ্ডই প্ৰমাণ কৰি দিলে অঞ্চলটোত আৰক্ষীৰ নিৰ্লিপ্ততাৰ চৰিত্ৰ।

ইফালে স্থানীয় ৰাইজে অভিযোগ কৰা অনুসৰি চাকলা বজাৰত ব্যাপক হাৰত বৃদ্ধি পোৱা তীৰ খেলৰ বাবেই সঘনাই সংঘটিত হ’বলৈ ধৰিছে এনেধৰণৰ চুৰিকাণ্ড। স্থানীয় ৰাইজে প্ৰশাসনক বাৰম্বাৰ অভিযোগ কৰাৰ পাছতো আৰক্ষী প্ৰশাসনে কিয় তীৰ খেল বন্ধ কৰাত গুৰুত্ব আৰোপ কৰা নাই সেয়া এক ডাঙৰ প্ৰশ্ন বুলি মত প্ৰকাশ কৰিছে।