সংশোধনী বিধেয়ক বাতিলৰ দাবীত নগাঁৱত কৃষক-শ্ৰমিক উন্নয়ন পৰিষদৰ অনিৰ্দিষ্টকালীন অনশন সাময়িকভাৱে স্থগিত
নাগৰিকত্ব সংশোধনী বিধেয়ক -২০১৬ বাতিলৰ দাবীত কৃষক-শ্ৰমিক উন্নয়ন পৰিষদৰ নগাঁও জিলা সমিতিয়ে জিলাখনৰ উপায়ুক্ত কাৰ্যালয়ৰ সমীপত গ্ৰহণ কৰা অনিৰ্দিষ্টকালীন অনশন কাৰ্যসূচী আজি তৃতীয় দিনা দিনৰ ১০ বজাত সাময়িকভাৱে স্থগিত ৰখা হয়।
একমাত্ৰ ৰাষ্ট্ৰীয় নাগৰিকপঞ্জী উন্নীতকৰণ প্ৰক্ৰিয়াত বাধা নাহিবৰ বাবে জিলা প্ৰশাসনে জনোৱা আহ্বানক সঁহাৰি জনাই এই অনশন কাৰ্যসূচী স্থগিত ৰাখিবলৈ সন্মতি প্ৰদান কৰে কৃষক-শ্ৰমিক উন্নয়ণ পৰিষদে।
উল্লেখ্য যে, জিলাখনৰ অতিৰিক্ত উপায়ুক্ত লাচিত দাসে অনশনস্থলীত উপস্থিত হৈ অনশনকাৰীসকলৰ লগত এক মত বিনিময়ত মিলিত হয়। মত বিনিময়কালত হোৱা কথা-বতৰাৰ অন্তত সংগঠনটোৱে প্ৰশাসনৰ তৰফৰ পৰা গ্ৰহণ কৰা স্থিতিক আন্তৰিকতাৰে মানি লৈ অনশন কাৰ্যসূচী স্থগিত ৰাখে।
আনহাতে, কাৰ্যসূচী স্থগিত ৰখাৰ প্ৰাক মুহূৰ্তত সংগঠনটোৱে দেশৰ প্ৰধানমন্ত্ৰীগৰাকীলৈ নাগৰিকত্ব সংশোধনী বিধেয়ক -২০১৬ বাতিলৰ দাবী সম্বলিত এক স্মাৰকপত্ৰ অতিৰিক্ত উপায়ুক্তগৰাকীৰ জৰিয়তে প্ৰেৰণ কৰে। সংগঠনটোৰ সাধাৰণ সম্পাদক উৎপল কুমাৰ বৰুৱাৰ উপস্থিতিত জিলা সভাপতি-সম্পাদক প্ৰাণতোষ হাজৰিকা আৰু অম্লানজ্যোতি মহন্ত স্বাক্ষৰিত স্মাৰক পত্ৰখন গ্ৰহণ কৰি অতিৰিক্ত উপায়ুক্তগৰাকীয়ে প্ৰধানমন্ত্ৰীক প্ৰদানৰ আশ্বাস দিয়ে।
যোৱা ২১ মে’ৰ দিনৰ ১০ বজাৰ পৰা আৰম্ভ হোৱা কাৰ্যসূচীত জিলাখনৰ বহু কেইটা ৰাজনৈতিক-অৰাজনৈতিক দল-সংগঠনে স্বতঃস্ফুৰ্তভাৱে অনশন কাৰ্যসূচীত অংশগ্ৰহণ কৰি কেন্দ্ৰীয় চৰকাৰে গৃহীত কৰিবলৈ অহৰ্নিশে চেষ্টা চলাই থকা এই জাতিধ্বংসী নাগৰিকত্ব বিধেয়কখন বাতিল কৰিবলৈ স্পষ্টভাৱে দাবী জনাইছিল। অনশন কাৰ্যসূচীত জিলাখনৰ বিভিন্ন স্তৰৰ বিভিন্নজন লোক উপস্থিত থাকি অনশনকাৰীসকলক উৎসাহ প্ৰদান কৰে। উল্লেখ্য যে, নাগৰিকত্ব সংশোধনী বিধেয়ক ২০১৬ বাতিলৰ দাবীত নগাঁৱত কৃষক-শ্ৰমিক উন্নয়ন পৰিষদে পালন কৰা অনশনস্থলীতে কেইবাজনো লোক কালি অসুস্থ হৈ পৰে।