সকলোৱে সহমত দিলে এন পি এফেও নিৰ্বাচনৰ পৰা আঁতৰি থাকিব : জেলিয়াং
এটা তাৎপৰ্য্যপূৰ্ণ মন্তব্যত নাগালেণ্ডৰ মুখ্য মন্ত্ৰী টি আৰ জেলিয়াঙে কৈছে যে আন আন ৰাজনৈতিক দলবোৰে যদি নিৰ্বাচন বৰ্জন কৰাৰ ক্ষেত্ৰত সহমতত উপনীত হয় তেওঁৰ দলেও একেই দায়বদ্ধতাৰে একেই পথ ল’ব।
উল্লেখযোগ্য যে অলপতে নাগালেণ্ড ট্ৰাইবেল হোহো-ইষ্টাৰ্ন নাগা পাব্লিক অৰ্গেনাইজেইশ্যন, নাগালেণ্ড ট্ৰাইবছ কাউন্সিল, চেণ্ট্ৰেল নাগালেণ্ড ট্ৰাইবছ কাউন্সিল, নাগা হোহোই নাগা ৰাজনৈতিক সংকট আগন্তুক বিধানসভা নিৰ্বাচনৰ পূৰ্বে সমাধান কৰাৰ দাবীত নিৰ্বাচন এৰাই চলিবলৈ জনোৱা এটা আহ্বানৰ প্ৰতিক্ৰিয়া হিচাপে জেলিয়াঙে এই কথা কয়। ‘নাগালেণ্ডত এই মুহূৰ্তত এন পি এফ নিৰ্বাচনৰ সন্মুখীন হোৱা তথা জিকাৰ ক্ষেত্ৰত আন সকলো দলতকৈ সুবিধাজনক অৱস্থাত আছে। কিন্তু সেইটো হ’লেও আমাৰ অগ্ৰাধিকাৰ হ’ল নাগা সমস্যাটোৰ সমাধানহে আৰু তাৰ বাবে আমি নিৰ্বাচনৰ বিষয়টোত আপোচ কৰিবলৈ সাজু।’ জেলিয়াঙে কয়।
তেওঁ কয় যে নাগালেণ্ডৰ কাৰ্য্যবাহী মুখ্য মন্ত্ৰী হিচাপে তেওঁ নাগা ৰাজনৈতিক সমস্যাটোৰ সন্মানজনক আৰু গ্ৰহণীয় সমাধান এটাৰ বাবে নিজৰ বৰঙনি আগ বঢ়াবলৈ সদায় সাজু আছে।
তেওঁ লগতে কয় যে যোৱা ২৩ জানুৱাৰিত এন পি এফে কেইবা দশক পুৰণি নাগা সমস্যাটোৰ নিৰ্বাচনৰ পূৰ্বেই সমাধান কৰিব লাগে বুলি বিধানসভাই লোৱা সিদ্ধান্তত সন্মতি জনাইছিল।
জেলিয়াঙে কয় যে যদিও ৰাজনৈতিক দলবোৰক সমাগত নিৰ্বাচনৰ বাবে কুচকাৱাজ চলোৱা দেখা গৈছে জনসাধাৰণৰ মতক গুৰুত্ব দিয়াৰ দৰকাৰ আছে আৰু ইয়াক সৰ্বাধিক অগ্ৰাধিকাৰ দিয়া উচিত। তেওঁ নাগা সমস্যাটোৰ শান্তিপূৰ্ণ আৰু গ্ৰহণযোগ্য সমাধান পাব বুলি নিজৰ আশাবাদ প্ৰকাশ কৰে।