স্বাধীনতাৰ সংগ্ৰামক আগুৱাই নিয়াৰ অংগীকাৰেৰে ফেচবুকত আত্মপ্ৰকাশ আলফা স্বাধীনৰ
স্বাধীনতাৰ সংগ্ৰামক আগুৱাই নিয়াৰ অংগীকাৰেৰে ছ’চিয়েল নেটৱৰ্কিং ছাইট ফেচবুকত আত্মপ্ৰকাশ কৰিলে সংযুক্ত মুক্তি বাহিনী, অসম চমুকৈ আলফা স্বাধীনে।
সংবাদ মাধ্যমলৈ প্ৰেৰণ কৰা এক বিজ্ঞপ্তিযোগে সংগঠনটোৱে কয়— ‘সময় তথা অলেখ শুভাকাংক্ষীৰ আন্তৰিক দাবীক সৰোগত কৰি সামাজিক যোগাযোগ মাধ্যমকো আমাৰ আপোচহীন সংগ্ৰামী যাত্ৰাৰ সংগী হিচাপে লোৱাৰ মানসেৰে আমি তথা সংযুক্ত মুক্তি বাহিনী, অসম (স্বাধীন) সংগঠনৰ প্ৰচাৰ বিভাগৰ পৰা নতুনকৈ ফেচবুকৰ জগতত ভৰি থোৱাৰ প্ৰয়াস কৰিছো। যদিও আমাৰ প্ৰকৃত ঠিকনা হ’ল অসমৰ থলগিৰি ৰাইজৰ উমাল বুকু। এই আপাহতে অসমৰ থলগিৰি ৰাইজৰ প্ৰতি আমাৰ আন্তৰিক কৃতজ্ঞতা জ্ঞাপন কৰিছো’।
উল্লেখযোগ্য যে বিবৃতিটোযোগে আলফা স্বাধীনে ফেচবুক তেওঁলোকৰ বাবে ওমলা ঘৰ নহয় বুলি প্ৰকাশ কৰি ইয়াৰ ব্যাপ্তিও সীমিত হ’ব বুলি উল্লেখ কৰে।
ফেচবুকত আলফা স্বাধীনৰ আত্মপ্ৰকাশৰ পাছত এতিয়াৰ পৰা সংগঠনটোৰ বিবৃতি সমূহ ছ’চিয়েল নেটৱৰ্কিং ছাইটত উপলব্ধ হ’ব।
প্ৰসংগক্ৰমে উল্লেখযোগ্য যে আলফা স্বাধীনৰ দীৰ্ঘদিনীয়া ইতিহাসত ছ’চিয়েল মিডিয়ালৈ অহাৰ নজিৰ নাই।সেয়েহে এইবাৰ পোন প্ৰথমবাৰৰ বাবে বিদ্ৰোহী সংগঠনটোৱে ফেচবুকত আত্মপ্ৰকাশ কৰি কি বাৰ্তা দিয়ে সেয়া লক্ষণীয় হ’ব। অৱশ্যে বিবৃতিটোযোগে আলফা স্বাধীনে এয়া তেওঁলোকৰ বাবে এক নতুন সম্পৰীক্ষা বুলি প্ৰকাশ কৰিছে।