সৰভোগ সমষ্টি যুৱ কংগ্ৰেছৰ প্ৰতিবাদ : মুখ্য মন্ত্ৰীলৈ প্ৰেৰণ স্মাৰক পত্ৰ
সোমবাৰে বৰপেটা জিলাৰ ৪০ নং সৰভোগ সমষ্টি যুৱ কংগ্ৰেছৰ উদ্যোগত আৰু বৰপেটা জিলা যুৱ কংগ্ৰেছৰ সহযোগত সৰভোগৰ বৰনগৰ ৰাজহ চক্ৰত ৰাজ্য চৰকাৰৰ বিৰুদ্ধে এক প্ৰতিবাদী কাৰ্যসূচী অনুষ্ঠিত হয়।
প্ৰতিবাদী কাৰ্য্যসূচীৰ অন্তত শাসনাধীন বিজেপি চৰকাৰখনে নিৰ্বাচনৰ পূৰ্বে আগবঢ়োৱা কেইবাটাও প্ৰতিশ্ৰুতি পালনত ব্যৰ্থ হোৱাৰ কথা দোহাৰি অতি শীঘ্ৰে উক্ত প্ৰতিশ্ৰুতি কাৰ্যকৰী কৰাৰ দাবীত বৰনগৰ ৰাজহ চক্ৰৰ চক্ৰ বিষয়াৰ জৰিয়তে মুখ্য মন্ত্ৰীলৈ এখন স্মাৰক পত্ৰ প্ৰেৰণ কৰে।
স্মাৰক পত্ৰখনত গাঁৱৰ প্ৰতিটো পৰিয়ালত বিদ্যুৎ সংযোগ কৰা, বিধায়ক গুৰুজ্যোতি দাসৰ পৰিয়ালত হোৱা এ পি এছ চিৰ ৫ গৰাকী অবৈধ নিযুক্তিৰ ঘটনাৰ চিবিআই তদন্ত কৰা আৰু সংবিধানৰ ষষ্ঠ অনুসূচী অনুসৰি ছয় জনগোষ্ঠীৰ জনজাতিকৰণৰ প্ৰসংগটোৰ ক্ষেত্ৰত প্ৰয়োজনীয় পদক্ষেপ গ্ৰহণ কৰাৰ বাবে উক্ত তিনিদফীয়া দাবী সম্বলিত স্মাৰক পত্ৰখন মুখ্য মন্ত্ৰীলৈ প্ৰেৰণ কৰা বুলি জানিব পৰা গৈছে।
উল্লেখ্য আজিৰ এই প্ৰতিবাদী কাৰ্যসূচীত এপিচিচিৰ সদস্য ৰফিকুল হক(ৰাজীব), যুৱ কংগ্ৰেছৰ সৰভোগ সমষ্টিৰ সভাপতি ফাৰুক খান, যুৱ কংগ্ৰেছৰ সৰভোগ সমষ্টিৰ সম্পাদক হৰেকৃষ্ণ দাস, বৰপেটাৰোড টাউন ব্লকৰ সভাপতি প্ৰদীপ দাসৰ লগতে অন্যান্য নেতা-কৰ্মী উপস্থিত থাকে।