হোজাই আৰক্ষীয়ে জিলাখনত অবৈধ সুৰাৰ বিৰুদ্ধে চলাইছে তীব্ৰ অভিযান

হোজাই জিলাত ভাৰতত তৈয়াৰী বিদেশী সুৰাৰ অবৈধ ব্যৱসায় উৎখাত কৰাৰ লক্ষ্যৰে এটা দায়িত্বশীল আৰক্ষীৰ দলে ধাৰাবাহিক অভিযান অব্যাহত ৰাখিছে। আৰক্ষীৰ দলটোৱে জিলাখনৰ বিদেশী সুৰা, দেশীয় সুৰাৰ অবৈধ ব্যৱসায়ৰ বিৰুদ্ধে সফলতাৰে অভিযান চলাই কেইবাটাও ঘাটি উৎখাত কৰাৰ লগতে জিলাখনত এনে অবৈধ ব্যৱসায়ৰ সৈতে জড়িত ব্যৱসায়ীক নাকী লগাবলৈ সক্ষম হৈছে।

উপ-আৰক্ষী অধীক্ষক বিনিতা নাথৰ নেতৃত্বত ডবকা আৰক্ষীৰ এটি দলে এক অভিযানৰ সময়ত বুধবাৰে নিশা হোজাই জিলাৰ জাব্ৰাইখোৱাত ৩৬ নং ৰাষ্ট্ৰীয় ঘাইপথৰ দাঁতিত থকা বিভিন্ন হোটেলত তালাচী চলায়।

আৰক্ষীৰ দলটোৱে বৃহৎ পৰিমানৰ অবৈধ বিদেশী সুৰা জব্দ কৰে।

আৰক্ষীয়ে জব্দ কৰা অবৈধ সুৰাখিনি নিজৰ জিম্মাত লয়। গোটেই বিষয়টোকলৈ তদন্ত এতিয়াও অব্যাহত আছে।

শেহতীয়াকৈ ৰাজ্যখনৰ বিভিন্ন স্থানৰ পৰা অবৈধভাৱে মজুত কৰি ৰখা বিদেশী সুৰা আৰক্ষীয়ে জব্দ কৰিছে। অলপতে শোণিতপুৰৰ বালিপাৰাত এক বৃহৎ পৰিমানৰ সুৰা আৰক্ষীয়ে জব্দ কৰিছিল।