য়ু পি এ’ চৰকাৰে ২জি কেলেংকাৰীৰ বাবে মন্ত্ৰীকে গ্ৰেপ্তাৰ কৰিছিল, দুৰ্নীতিক লৈ মোদী এতিয়া নীৰৱ কিয় : কংগ্ৰেছ নেতা গুলাম নবী

কংগ্ৰেছ নেতা গুলাম নবী আজাদে আজি গুৱাহাটীত এক সংবাদ মেলত বিজেপি চৰকাৰৰ দিনত দেশৰ দুৰ্নীতিৰ ‘আন্তৰ্জাতিকীকৰণ’ হোৱা বুলি অভিহিত কৰে। তেওঁ কয়, ‘এতিয়া দেশৰ দুৰ্নীতিবিলাকৰ পৰিমাণ ৪ হাজাৰ, ৮ হাজাৰ আৰু ১১ হাজাৰ হৈছেগৈ।’

বিভিন্ন দেশ আৰু আন্তঃৰাষ্ট্ৰীয় নেতাৰ লগত প্ৰধান মন্ত্ৰী নৰেন্দ্ৰ মোদীয়ে ঘনিষ্ঠ সম্পৰ্ক থকা বুলি দাবী কৰি অহাৰ কথা উল্লেখ কৰি আজাদে বেংক লুটাৰ অভিযোগত অভিযুক্ত হীৰা ব্যৱসায়ী নীৰৱ মোদীক ঘূৰাই অনাৰ ক্ষেত্ৰত প্ৰধান মন্ত্ৰীক কিহে বাধা দিছে বুলি প্ৰশ্ন তোলে।

দুৰ্নীতিৰ প্ৰসংগত প্ৰধান মন্ত্ৰীৰ নীৰৱতাত প্ৰশ্ন তুলি তেওঁ কয়, ‘২ জি কেলেংকাৰীৰ তদন্তৰ নিৰ্দেশ আমাৰ চৰকাৰেই দিছিল আৰু আনকি মন্ত্ৰীকো গ্ৰেপ্তাৰ কৰা হৈছিল।

বিজেপিয়ে দেশৰ বৈচিত্ৰ্যতাক আঘাত কৰিছে বুলি অভিযোগ কৰি কংগ্ৰেছ নেতাজনে কয় যে মানুহৰ খাদ্যাভ্যাস বা মানুহ মন্দিৰ, মছজিদ, গীৰ্জা, নে গুৰদ্বাৰলৈ যায় তাক লৈ চৰকাৰে হস্তক্ষেপ কৰাতো ভাৰতত কেতিয়াও হোৱা নাই।

‘কোনে কি মাংস ৰান্ধিছে বা ফ্ৰিজত কি মাংস ৰাখিছে চাবলে তেওঁলোকে মানুহৰ ঘৰ বা হষ্টেলত সোমাইছেগে’ বুলি মন্তব্য কৰি তেওঁ কয় যে ভাৰতত শাসক দলৰ দায়িত্ব কেতিয়াও সেইটো নাছিল।

আনহাতে ‘বিজেপি চৰকাৰ অহাৰ পিছতে অসমত সকলো আৰ্থিক কাৰ্য্যকলাপ বন্ধ হৈ গৈছে’ বুলি দাবী কৰি তেওঁ কয় যে বিজেপিক শাসনলৈ আনি অসমৰ ৰাইজে জীয়াতু ভুগিব লগা হৈছে।

‘উত্তৰ-পূৰ্বাঞ্চলৰ ৰাজ্যসমূহৰ বিশেষ মৰ্য্যাদা আৰু উত্তৰ-পূব ঔদ্যোগিক আৰু বিনিয়োগ প্ৰসাৰ নীতি (North East Industrial and Investment Promotion Policy) বাতিল কৰি’ ‘বিজেপি চৰকাৰে উত্তৰ-পূৰ্বাঞ্চলৰ প্ৰতি বিৰাট অন্যায় কৰিছে’।

মেঘালয় বিধানসভা নিৰ্বাচনৰ প্ৰচাৰ চলাবলৈ অহা ক্ংগ্ৰেছৰ জ্যেষ্ঠ নেতা তথা ৰাজ্যসভাৰ বিৰোধী দলপতিজনে ৰাজীৱ ভৱনত সংবাদ মেলখন সম্বোধন কৰিছিল।