১৭ জানুৱাৰীৰ পৰা আৰম্ভ হ’ব শিল্পগ্ৰাম মহোৎসৱ
উত্তৰ-পূব মণ্ডল সাংস্কৃতিক কেন্দ্ৰই শিল্পগ্ৰাম মহোৎসৱ ২০১৮ অনুষ্ঠিত কৰিবলৈ সাজু হৈ উঠিছে। শিল্পগ্ৰামৰ দ্বাদশ প্ৰতিষ্ঠা দিৱস উপলক্ষে কলা, সংগীত, নাটক, খাদ্য, শিল্প আৰু শিশু মেলাকে আদি কৰি এই সকলোবোৰ সামৰি এখন ৰাষ্ট্ৰীয় পৰ্যায়ৰ মহোৎসৱ হ’ব শিল্পগ্ৰাম মহোৎসৱ। এই মহোৎসৱ খনি আজি কেই বছৰ ধৰি অনুষ্ঠিত হৈ আহিছে।
বিভিন্ন শিল্পীৰ, শিল্পকলাৰ লগত জড়িত ব্যক্তিক প্ৰদৰ্শনৰ সুযোগ আগবঢ়োৱা শিল্পগ্ৰাম হৈছে এখন সাংস্কৃতিক অনুশীলনৰ কেন্দ্ৰ। কেন্দ্ৰটোৱে বেচৰকাৰী সংস্থা, কলা-সংস্কৃতিৰ লগত জড়িত ব্যক্তি, বিদ্যালয়, মহাবিদ্যালয় তথা বিশ্ববিদ্যালয়ৰ ব্যাপক অংশগ্ৰহণ নিশ্চিত কৰাৰ প্ৰয়াস কৰি আহিছে।
বৰ্ণিল সাংস্কৃতিক কাৰ্যসূচীসমূহ অহা ১৭ জানুৱাৰিৰ পৰা ২০ জানুৱাৰিলৈকে গুৱাহাটীৰ পাঞ্জাবাৰীত অনুষ্ঠিত হ’ব। ভাৰতবৰ্ষৰ বিভিন্ন প্ৰান্তৰ পৰা শিল্পী তথা শিল্পকলা-কুশলীসকলে এই সাংস্কৃতিক মহা সমাৰোহত অংশগ্ৰহণ কৰিব।
মহোৎসৱখনিৰ মুখ্য আকৰ্ষণ হ’ব শিশুৰ প্ৰতিভা প্ৰদৰ্শনৰ মেলা, যাদু প্ৰদৰ্শনী, পেইন্টিং তথা চিত্ৰাংকন কৰ্মশালা, লোকনৃত্য আৰু সংগীত, মূকাভিনয়, সোনাল মানসিং ৰ শাস্ত্ৰীয় নৃত্যকে ধৰি অসমৰ বিভিন্ন জনপ্ৰিয় শিল্পীৰ সংগীতৰ সমাহাৰ।
ৰাতিপুৱা ১১ বজাৰ পৰা নিশা ৯.৩০ বজালৈকে সকলোৰে বাবে বিনামূলীয়া প্ৰৱেশ থাকিব। অনুষ্ঠান প্ৰদৰ্শনৰ ক্ষেত্ৰত ব্যক্তিগত আৰু অৰ্দ্ধ চৰকাৰী সংস্থাৰ বাবে শিল্প গ্ৰামৰ সুবিধা সুলভ কৰি ৰখা হ’ব।