১৯৬৪-ৰ শৰণাৰ্থীৰ ভুৱা নথিৰে এন আৰ চিত নাম অন্তৰ্ভুক্তিৰ চেষ্টা ২০১১ চনত অহা বাংলাদেশীৰ

শিলচৰত আজি ভুৱা তথ্যৰে এন আৰ চিত নাম অন্তৰ্ভুক্তিৰ চেষ্টা কৰা এজন বাংলাদেশীক এন আৰ চিৰ কৰ্তৃপক্ষই ধৰি আৰক্ষীক চমজাই দিয়ে। ধৃত বাংলাদেশীটোৰ নাম নিখিল দাস (২৬) বুলি জানিব পৰা গৈছে।

উল্লেখযোগ্য যে ধৃত নিখিল দাসৰ বাংলাদেশৰ ছিলেট সুনামগঞ্জত প্ৰকৃত ঘৰ হোৱা সত্তেও নিখিলে শিলচৰ কৰাতিগ্ৰমৰ নিৱাসী বুলি এন আৰ চিত নাম অন্তৰ্ভুক্তিৰ চেষ্টা কৰিছিল। কিন্তু পিছত নিখিলৰ বংশ বৃক্ষৰ পৰীক্ষাৰ সময়তহে প্ৰকৃত তথ্য পোহৰলৈ আহে। ফলত লগে লগে এন আৰ চি কৰ্তৃপক্ষই নিখিলক আৰক্ষীক চমজাই দিয়ে।

ইফালে আৰক্ষীৰ জেৰাত নিখিলে নিজকে বাংলাদেশী বুলি স্বীকাৰ কৰিছে। লগতে পোহৰলৈ আহিছে বহু ভয়ংকৰ বিস্ফোৰক তথ্য।

মন কৰিব লগীয়া যে নিখিল ২০১১ চনতহে ভাৰতলৈ আহিছে যদিও এন আৰ চিত ১৯৬৪ চনৰে শৰণাৰ্থীৰ প্ৰমাণপত্ৰ, ভোটাৰ আই কাৰ্ড, পেনকাৰ্ড সহ বহু ভুৱা তথ্য দাখিল কৰিছিল। আনকি নিখিলে শিলচৰৰ এজন অধিবক্তাক ৮ হাজাৰ টকা দি ১৯৬৪ চনৰ শৰণাৰ্থীৰ প্ৰমাণপত্ৰকে ধৰি বিভিন্ন ভুৱা নথি-পত্ৰ সংগ্ৰহ কৰিছিল।

প্ৰাপ্ত তথ্য মতে নিখিল ২০১১ চনৰ পিছত ত্ৰিপুৰা সীমান্তই দি অবৈধভাৱে অসমত প্ৰৱেশ কৰি শিলচৰৰ ৰংপুৰত নিজৰ আত্মীয়ৰ ঘৰত বসবাস কৰিছিল।

ইতিমধ্যে আৰক্ষীয়ে ঘটনা সন্দৰ্ভত অনুসন্ধান চলোৱাৰ লগতে নিখিলক ভুৱা নথি-পত্ৰ উলিয়াই দিয়াত সহযোগিতা কৰা শিলচৰৰ অধিবক্তাজনৰ বিৰুদ্ধেও অভিযান চলাইছে।