৩০ অক্টোবৰৰ বোমা বিস্ফোৰণৰ শুনানি আৰম্ভ

২০০৮ চনৰ ৩০ অক্টোবৰত গুৱাহাটী মহানগৰীৰ মাজমজিয়া গণেশগুৰিৰ অ’ভাৰব্ৰীজৰ তলত সংঘটিত গোটেই ৰাজ্য কঁপোৱা বোমা বিস্ফোৰণ ঘটনাৰ তদন্ত কৰাৰ উদ্দেশ্যে গঠিত ফাষ্ট ট্ৰেক ক’ৰ্টে আজিৰ পৰা গোচৰটোৰ শুনানি আৰম্ভ কৰিছে। মন কৰিব লগীয়া যে গোচৰটোৰ ক্ষিপ্ৰ ব্যৱস্থা গ্ৰহণৰ উদ্দেশ্যে গুৱাহাটী উচ্চ ন্যায়ালয়ে এখন বিশেষ আদালত গঠনৰ পৰামৰ্শ দিছিল। উ্ল্লেখযোগ্য যে এন ডি এফ বিৰ ৰঞ্জন দৈমাৰী গোটৰ দ্বাৰা সংঘটিত বুলি অভিযোগ থকা উক্ত বিস্ফোৰণত ৯০ জনতকৈ বেছি লোক নিহত হোৱাৰ লগতে ৪০০ কৈ বছি লোক আহত হৈছিল।  বিচাৰ প্ৰক্ৰিয়া আৰম্ভ হোৱাৰে পৰা চি বি আই দাখিল কৰা শ্বাৰ্জচিটৰ মুঠ ৮২৯ জন প্ৰতক্ষ্যদৰ্শীৰ মাত্ৰ ৮৭ জনৰ হে জবানবন্দী লোৱা হৈছে। ইয়াৰ উপৰি অন্য বহু তথ্য এতিয়াও প্ৰস্তুত কৰিবলৈ বাকী আছে। প্ৰাপ্ত তথ্য মতে উক্ত শুনানি কালত ৮৫০ জন প্ৰতক্ষ্যদৰ্শীৰ জবানবন্দী লোৱা হ’ব। গোচৰটোৰ মূল অভিযুক্ত এন ডি এফ বিৰ প্ৰধান ৰঞ্জন দৈমাৰীক মহানগৰীৰ চানমাৰিস্থিত চি বি আই ক’ৰ্টত হাজিৰ কৰোৱা হৈছিল। মন কৰিব লগীয়া যে ২০০৯ চনত বাংলাদেশত আটক হোৱা দৈমাৰী বৰ্তমান জামিনত আছে। চি বি আইয়ে অনুসন্ধানটো হাতত লোৱাৰ পিছতে দৈমাৰীৰ সৈতে মুঠ ২২ জন অভিযুক্তকাৰীৰ নাম শ্বাৰ্জচিটযোগে এখন নিম্ন আদালতত দাখিল কৰিছিল। ২০১১ ৰ পৰা গোচৰটোৰ বিচাৰ প্ৰক্ৰিয়া চেচন জাজ কৰ্টত চলি আছিল। উল্লেখযোগ্য যে উক্ত গোচৰটোৰ সন্দৰ্ভত এখন ফাষ্ট ট্ৰেক গঠন কৰাৰ সিদ্ধান্তই  ভূক্তভোগী পৰিয়াললৈ কিছু সকাহ আনিছে।