৩০ মে’ৰ ভিতৰত ঘোষণা কৰা হ’ব উচ্চতৰ মাধ্যমিকৰ ফলাফল

উচ্চতৰ মাধ্যমিক চূড়ান্ত পৰীক্ষাৰ ফলাফল চলিত মাহতেই ঘোষণা কৰা হ’ব। অসম উচ্চতৰ মাধ্যমিক শিক্ষা সংসদৰ অধ্যক্ষ ড০ দয়ানন্দ বৰগোহাঁয়ে শুকুৰবাৰে সংবাদ মাধ্যমক জানিবলৈ দিয়ে যে অহা ৩০ মে’ৰ ভিতৰত উচ্চতৰ মাধ্যমিকৰ ফলাফলসমূহ ঘোষণা কৰা হ’ব।

এই ক্ষেত্ৰত ফলাফল ঘোষণাৰ নিদিৰ্ষ্ট দিন এটা অৱশ্যে শিক্ষা সংসদে এতিয়াও প্ৰকাশ কৰা নাই ।

উল্লেখযোগ্য যে উচ্চতৰ মাধ্যমিক চূড়ান্ত পৰীক্ষা ২৩ ফেব্ৰুৱাৰিৰ পৰা ২২ মাৰ্চৰ ভিতৰত অনুষ্ঠিত হৈছিল। কিন্তু উচ্চতৰ মাধ্যমিকৰ বিজ্ঞান শাখাৰ তিনিখনকৈ প্ৰশ্নকাকতৰ বিসংগতিয়ে এইবাৰ তীব্ৰ বিতৰ্কৰ সূচনা কৰিছিল। ৰসায়ন বিজ্ঞান, পদাৰ্থ বিজ্ঞান আৰু গণিতৰ প্ৰশ্নকাকতক লৈ পৰীক্ষাৰ্থীৰ মাজত সৃষ্টি হোৱা বিভ্ৰান্তিক লৈ শিক্ষা সংসদক বিভিন্ন দল সংগঠনে গৰিহনা দিছিল আৰু ৰাজ্যজুৰি প্ৰতিক্ৰিয়াৰ সৃষ্টি হৈছিল।

গোৱালপাৰা ছায়েন্স একাডেমিত প্ৰশ্নকাকত ফাদিলক লৈও তীব্ৰ সমালোচনাৰ সন্মুখীন হৈছিল শিক্ষা সংসদ। ছাত্ৰ-ছাত্ৰী, অভিভাৱক আৰু বিভিন্ন দল-সংগঠনে পুনৰ পৰীক্ষা অনুষ্ঠিত কৰিবলৈকো দাবী জনাইছিল যদিও শিক্ষা সংসদে সেই দাবী মানি নল’লে।

চৰম বিসংগতিৰ মাজেৰে পৰীক্ষা অনুষ্ঠিত কৰা উচ্চতৰ শিক্ষা সংসদে এতিয়া ফল ঘোষণা কৰিবলৈ লৈ যথেষ্ট সতৰ্কতা অৱলম্বন কৰিবলগীয়া হৈছে। অৱশ্যে,ফলাফল ঘোষণাৰ পিছতহে সংসদৰ স্বচ্ছতাৰ দিশটো স্পষ্ট হৈ পৰিব।