ৰহাৰ টোল গে’ট: ২৮ জুলাইত পুনৰ মুকলি; আলোচনাক লৈ নতুন চৰ্ত কৃষক মুক্তি, অ: জা: যু: ছা: প:ৰ
ৰহাত টল গে’টৰ বিৰুদ্ধে প্ৰতিবাদৰ সময়ত পলাশ চাংমাই আৰু অখিল গগৈ। ফাইল ছবি।
বিভিন্ন দল-সংগঠনৰ বিৰোধিতাক অগ্ৰাহ্য কৰি কাইলৈ ২৮ জুলাইৰ পুৱাৰে পৰা পুনৰ মুকলি হ’ব ৰহাৰ টোল গে’ট।
নগাঁৱৰ উপায়ুক্তৰ কাৰ্য্যালয়ত আজি ২৭ জুলাইত এক সংবাদমেলত উপায়ুক্ত আৰু ৰাষ্ট্ৰীয় ঘাইপথ প্ৰাধিকৰণৰ প্ৰবন্ধকে এই কথা ঘোষণা কৰিছে।
আনহাতে ৰাজ্য চৰকাৰে অংশ গ্ৰহণ কৰা আলোচনাতহে ভাগ ল’ব বুলি ঘোষণা কৰি জিলা প্ৰশাসন আৰু ঘাইপথ প্ৰাধিকৰণে আজি দিনৰ ৩.৩০ বজাত আয়োজন কৰা বৈঠক বৰ্জন কৰিছে কৃষক মুক্তি সংগ্ৰাম সমিতি আৰু অসম জাতীয়তাবাদী যুৱ ছাত্ৰ পৰিষদে।
জিলা উপায়ুক্তক এই সন্দৰ্ভত এক স্মাৰক পত্ৰও প্ৰদান কৰিছে ৰহাৰ টোল গে’টবিৰোধী আন্দোলনৰ নেতৃত্ব দিয়া সংগঠন দুটাই।
টোল গে’টখন বন্ধ থকাৰ বাবে দৈনিক ১০ লাখ ৩৯ হাজাৰ টকা লোকচান হোৱা বুলি দাবী কৰি টোল গে’ট সন্দৰ্ভত আপত্তি থাকিলে ন্যায়ালয়ত গোচৰ তৰাৰ আহ্বান জনাইছে ঘাইপথ প্ৰাধিকৰণে।