ৰহিঙীয়া শৰণাৰ্থীক সমৰ্থনেৰে ম্যানমাৰ অ’পেন নেখেলাৰ সিদ্ধান্ত বাংলাদেশী গ’ল্ফাৰৰ

বাংলাদেশী গ’ল্ফাৰ চিদ্দিকুৰ ৰহমানে ৰহিঙীয়া শৰণাৰ্থীসকলৰ প্ৰতি সহমৰ্মিতা প্ৰকাশ কৰি কালি লিঅ’পেলে’চ-২১ ম্যানমাৰ অ’পেন প্ৰতিযোগিতাত অংশগ্ৰহণ নকৰাৰ সিদ্ধান্ত লৈছে। এ’ এফ পিৰ বাতৰিৰ আধাৰত মিজিমা নিউজে এই খবৰ প্ৰকাশ কৰিছে।

ম্যানমাৰৰ ৰাখিনে প্ৰদেশত যোৱা আগষ্ট মাহৰ পৰা চলা অত্যাচাৰৰ ফলত এতিয়ালৈকে প্ৰায় ৬৯০,০০০ ৰহিঙীয়া লোক বাংলাদেশত প্ৰৱেশ কৰিছে।

চিদ্দিকুৰে কয় যে ৭৫০,০০০ মাৰ্কিন ডলাৰৰ এছিয়া ট্যুৰ প্ৰতিযোগিতাখনত অংশগ্ৰহণ কৰিবলৈ তেওঁৰ ‘এক ধৰণৰ অসহজ’ লাগিছে।

আজিৰপৰা য়েংগনত এই প্ৰতিযোগিতাখন আৰম্ভ হৈছে।

ঢাকাত সাংবাদিকসকলক তেওঁ কয় যে, ‘মই ৰহিঙীয়াসকলক সমৰ্থন কৰোঁ, সেয়ে মই নগ’লো। মুছলমান বাবেও তালৈ যোৱাটো মোৰ বাবে নিৰাপদ যেন নালাগিল।’

চিদ্দিকুৰ বাংলাদেশত এগৰাকী গ’ল্ফ আইকন (উপাস্য গ’ল্ফাৰ)। চিদ্দিকুৰ ২০১৬ চনত স্বয়ংক্ৰিয়ভাৱে অলিম্পিকলৈ বাচনি হোৱা প্ৰথম বাংলাদেশী গ’ল্ফাৰ।