ৰাষ্ট্রীয় নাগৰিকপঞ্জীখন শুদ্ধ নহ’লে অসমত অশান্তিৰ সৃষ্টি হ’ব : ড০ হীৰেন গোহাঁই
ৰাষ্ট্রীয় নাগৰিকপঞ্জীখন শুদ্ধ নহ’লে অসমত অশান্তিৰ সৃষ্টি হ’ব। গুৱাহাটী প্রেছ ক্লাবত দেওবাৰে যোৰহাটৰ গতি সাংস্কৃতিক গোষ্ঠীয়ে প্রদান কৰা ২০১৮ বর্ষৰ ‘অসম গৌৰৱ বঁটা’ গ্রহণ কৰি ড০ গোহাঁয়ে এই মন্তব্য কৰে।
ড০ গোহাঁয়ে এই সন্মান পাই উৎসাহিত হোৱা বুলি উল্লেখ কৰি কয় যে এয়া এক আশীর্বাদ। তেওঁ লগতে সদায় অসমীয়া সমাজৰ উপকাৰ হোৱাকৈ কাম কৰি আহিছোঁ বুলি ব্যক্ত কৰে।
তেওঁ কয় যে এই বঁটাৰ যোগ্যতা সময়েহে দিব ৷ ১৯৪৭ চনৰ স্বাধীনতাৰ পতাকা উত্তোলন দেখা বুলি উল্লেখ কৰি তেওঁ এই স্বাধীনতা সার্থক নহ’ল আৰু নাগৰিকে এতিয়াও প্রাপ্য অধিকাৰৰ পৰা বঞ্চিত হৈ থকা বুলি কয়।
ৰাজ্যজুৰি নাগৰিকত্ব সংশোধনী বিধেয়ক ২০১৬-ৰ বিৰোধিতাত তীব্র প্রতিবাদ সাব্যস্ত হৈ থকাৰ সময়তে বুদ্ধিজীৱী ড০ হীৰেন গোহাঁয়ে জাতিধবংসী বিধেয়কখন বাতিলৰ দাবীত সকলোকে ওলাই আহিবলৈ পুনৰ আহবান জনায়।
গতি সাংস্কৃতিক গোষ্ঠীৰ সভাপতি মৃদুল কুমাৰ বৰাই সঞ্চালনা কৰা সভাত বিশিষ্ট অতিথি হিচাপে উপস্থিত থাকে জ্যেষ্ঠ সাংবাদিক অজিত কুমাৰ ভূঞা, জ্যেষ্ঠ অধিবক্তা অৰূপ বৰবৰা, নিৱন্ধকাৰ বৰুণ বৰগোহাঁই আৰু কেইবাজনো বিশিষ্ট ব্যক্তি।
গতি সাংস্কৃতিক গোষ্ঠীয়ে ড০ গোহাঁইক অসমীয়া জাতিটোৰ উত্তৰণৰ ক্ষেত্রত আগবঢ়োৱা অৱদানৰ বাবে প্রদান কৰা এই বঁটাৰ লগত নগদ ১০ হাজাৰ টকা, এখন অভিনন্দন পত্র, শৰাই আৰু এটা স্মাৰক প্রদান কৰে।
আনহাতে এই বঁটা প্রদান অনুষ্ঠানত অজিত কুমাৰ ভূঞাই ড০ হীৰেন গোহাঁইক সাম্প্রতিক অসমীয়া জাতিৰ এগৰাকী বিবেক আখ্যা দি কয় যে তেওঁৰ পাণ্ডিত্য, অৰিহণাক লৈ প্রতিজন অসমীয়াই গৌৰৱ কৰিব লাগে। তেওঁ কয় যে ড০ গোহাঁই ঘৰত সোমাই থাকি লিখা-মেলা কৰি থকা বুদ্ধিজীৱী নহয়৷ আজি জাতিৰ সংকটৰ সময়ত তেওঁ ওলাই আহিছে।
অধিবক্তা অৰূপ বৰবৰাই হীৰেন গোহাঁইক এটা বৌদ্ধিক অনুষ্ঠান বুলি উল্লেখ কৰি তেওঁৰ নিভাঁজ দেশপ্রেম, জাতিপ্রেম, সামাজিক দায়বদ্ধতা আৰু সাম্যবাদী চেতনাৰ বিষয়ে ব্যক্ত কৰে। সভাত যোৰহাটৰ ‘আজিৰ সময়’ আলোচনীখনৰ পৰিয়ালৰ লগতে বহুকেইজন বিশিষ্ট ব্যক্তিয়েও ড০ গোহাঁইক সম্বর্ধনা জনায়।
আনহাতে, বিশিষ্ট শিক্ষাবিদ, কবি, সাহিত্যিক, ৰাজনীতিজ্ঞ হেম বৰুৱাৰ নামত প্ৰতিষ্ঠিত, হেম বৰুৱা ন্যাসে ২০১৭-২০১৮ বৰ্ষৰ বাবে হেম বৰুৱা বঁটা আগবঢ়াইছে বিশিষ্ট শিক্ষাবিদ, সাহিত্য সমালোচক, সমাজকৰ্মী, চিন্তাবিদ ড০ হীৰেন গোহাঁইলৈ।
হেম বৰুৱা ন্যাসে প্ৰকাশ কৰা অনুসৰি চলিত মাহৰ ১১ জুনত দিনৰ ১১ বজাত গুৱাহাটী প্ৰেছ ক্লাবত ৰাজ্যখনৰ বিশিষ্ট চিন্তাবিদ গৰাকীক এই বঁটা প্ৰদান কৰা হ’ব।