ৰাষ্ট্ৰীয় পৰ্যায়ৰ টেলিভিশ্যন ৰিয়েলিটী শ্ব’লৈ গোৱালপাৰাৰ লুনা দেৱী
সংগীতৰ ক্ষেত্ৰখনত নতুন আলোড়ন সৃষ্টি কৰিবলৈ সক্ষম হোৱা অসমৰ গোৱালপাৰাৰ সন্তান কণমানি লুনা দেৱীয়ে ৰাষ্ট্ৰীয় পৰ্যায়ৰ টেলিভিশ্যন চেনেল কালাৰ্চত চলিব লগীয়া ‘ৰাইজিং ষ্টাৰ’২০১৭ সংগীত প্ৰতিযোগিতালৈ নিৰ্বাচিত হ’বলৈ সক্ষম হৈছে। জানিব পৰা মতে যোৱা ১১ নৱেম্বৰত মহানগৰীৰ ৰয়েল গ্ল’বেল ইউনিভাৰ্চিটীত কালাৰ্চে উত্তৰ-পূৰ্বাঞ্চলৰ ভিত্তিত কণ্ঠ পৰীক্ষা অনুষ্ঠত কৰিছিল । ৪ বছৰৰ পৰা ১৩ বছৰ বয়সসীমালৈকে যোগদান কৰা প্ৰায় ৩০০০ প্ৰতিযোগীৰ মাজৰ পৰা মুঠ ১০ গৰাকী নিৰ্বাচিত হৈছিল। তাৰ ভিতৰতে নিৰ্বাচিত হ’বলৈ সক্ষম হৈছিল গোৱালপাৰাৰ আগিয়াৰ কণমানি লুনা।
ইতিমধ্যে লুনাক এই ৰিয়েলিটী শ্ব’ত অংশগ্ৰহণৰ বাবে মুম্বাইলৈ আমন্ত্ৰণ জনোৱা হৈছে। লুনাৰ পিতৃ পেছাত এখন বেচৰকাৰী বিদ্যালয়ৰ শিক্ষক। আগিয়াৰ বালিজানা আঞ্চলিক বিদ্যালয়ৰ এজন শিক্ষক হিচাপে লুনাৰ পিতৃয়ে মাজে-সময়ে পৰিয়াল পোহপাল দিয়াৰ ক্ষেত্ৰত সমস্যাত ভোগে। তথাপি নিজ কন্যাৰ এই সাফল্যই তেওঁক অত্যন্ত সুখী কৰিছে।
উল্লেখযোগ্য যে লুনা দেৱীয়ে অসমৰ জনপ্ৰিয় চেনেল ৰামধেনুৰ দ্বাৰা আয়োজিত ঝংকাৰ দ্যা লিটিল চেম্পছ ছিজন-২ ৰ দ্বিতীয় ৰাউণ্ডলৈকে প্ৰৱেশ কৰিছিল। লুনাৰ এই সাফল্যই সমগ্ৰ আগিয়া অঞ্চলটোলৈ গৌৰৱ কঢ়িয়াই আনিছে বুলি অঞ্চলবাসীয়ে কয়। ৰাষ্ট্ৰীয় পৰ্যায়ৰ টেলিভিশ্যন চেনেলৰ ৰিয়েলিটী শ্ব’ত যোগদান কৰিবলৈ সুবিধা পোৱা বাবে গোৱালপাৰা জিলা নাথ যোগী ছাত্ৰ সন্থাই ভূয়সী প্ৰশংসা কৰিছে।
এন ই নাওৰ তৰফৰ পৰাও গোৱালপাৰাৰ লুনালৈ অশেষ শুভকামনা জ্ঞাপন কৰা হ’ল।