ডিক্ৰঙত মাছমৰীয়া নাও দুৰ্ঘটনাগ্ৰস্ত হৈ নিহত ১জন : মৃতদেহৰ সন্ধানত অভিযান অব্যাহত

লখিমপুৰৰ বিহপুৰীয়াৰ ওচৰত সংঘটিত নাও দুৰ্ঘটনা এটাত এজন লোকৰ মৃত্যু হৈছে আৰু পানীত উটি যোৱা অন্য ৩ জনে সাঁতুৰি পাৰত উঠিবলৈ সক্ষম হোৱা বুলি জানিব পৰা গৈছে। ঘটনাৰ বিৱৰণি মতে, বিহপুৰীয়াৰ গন্ধিয়াৰ ৪জন মাছমৰীয়াই যোৱা নিশা দিক্ৰঙত এখন সৰু নাৱেৰে মাছ ধৰিবলৈ ওলাই গৈছিল।

প্ৰায় ৪ঘণ্টা ধৰি মাছ ধৰাৰ পাছত তেওঁলোকে যেতিয়া নৈৰ পাৰলৈ নাও চপাবলৈ লয় তেতিয়াই দুৰ্ঘটনাটো সংঘটিত হয়। নদীৰ মাজত নাওখন ওলোটা হৈ পৰাৰ ফলত চাৰিওজন মাছমৰীয়া নদীত পৰি যায়। যদিওবা ইয়াৰে ৩জন মাছমৰীয়াই কোনোমতে সাঁতুৰি পাৰলৈ আহিবলৈ সক্ষম হয় আনজনক দিক্ৰঙৰ কোবাল সোঁতে উটুৱাই নিয়ে। নৈত উটি যোৱা মাছমৰীয়াজনক চিৰন্তন মাল্লা বুলি চিনক্ত কৰা হৈছে।

আজি পুৱা ৰাজ্যিক দুৰ্যোগ প্ৰশমন বিভাগৰ এটা দলে  লোকজনৰ মৃতদেহটো উদ্ধাৰ কৰিবলৈ নদীত তালাচী চলায়। অৱশ্যে প্ৰতিৱেদন যুগুত কৰালৈকে উদ্ধাৰকাৰী দলটোৱে মৃতদেহৰ সন্ধান লাভ কৰা নাই।

উল্লেখ্য যে ৩ দিন পূৰ্বে লখিমপুৰ জিলাৰ সোৱণশিৰি নদীত এখন যাত্ৰীবাহী ফেৰী ইঞ্জিন বিকল হোৱাৰ ফলত ঠিক এনেদৰেই দুৰ্ঘটনাগ্ৰস্ত হৈছিল। অৱশ্যে আটাইকেইজনক উদ্ধাৰ কৰিবলৈ সক্ষম হৈছিল।

ইতিপূৰ্বে কৈ অহা হৈছে যে লখিমপুৰ জিলাত চলাচল কৰি থকা অধিক সংখ্যক নাওৰেই যথোপযুক্ত মেৰামতি কৰা নহয় আৰু যাত্ৰীৰ নিৰাপত্তাৰ বিষয়টোৰ ওপৰতো চকু দিয়া নহয়। লক্ষ্যণীয় যে এই ক্ষেত্ৰত সংশ্লিষ্ট কৰ্তৃপক্ষই বিষয়টোলৈ সম্পূৰ্ণ উদাসীনতা প্ৰদৰ্শন কৰি আহিছে।