আৰক্ষীৰ জালত ডিমা হাচাওত অগপ নেতাক ভাবুকি দিয়া দুৰ্বৃত্তৰ দল; অস্ত্ৰসহ ১১জনক আটক

যোৱা ১৯ আগষ্টৰ নিশা মাইবাঙ মহকুমাৰ হাজাদিচাৰ নাবলাইদিচা গাঁৱত অগপৰ ডিমা হাচাও জিলা ট্ৰাইবেল পৰিষদৰ সভাপতি ফিৰ’জ লাংথাচাক বিচাৰি অহা দুৰ্বৃত্ত দলৰ ১১ গৰাকী সদস্যক আটক কৰিবলৈ সক্ষম হৈছে অসম আৰক্ষী।

আজি হাফলংত এক সংবাদমেল পাতি এই কথা সদৰি কৰে ডিমা হাচাওৰ আৰক্ষী অধীক্ষক প্ৰশান্ত শইকিয়ায়। দুৰ্বৃত্ত দলটোৰ পৰা আৰক্ষীয়ে ৩টা এছ বি বি এল বন্দুক, ৬টা ১২ ব’ৰ কাৰ্টিজ, ১টা হস্তনিৰ্মিত বন্দুক আৰু এজোৰ সেনা পোছাক উদ্ধাৰ কৰে।

উল্লেখযোগ্য যে যোৱা ২৩ আগষ্টত ফিৰ’জ লাংথাচাই এক সংবাদমেল অনুষ্ঠিত কৰি কৈছিল যে ১৯ আগষ্টত হাজাদিচা পৰিষদীয় সমষ্টিৰ দৈৰাঙ্গি গাঁৱত অগপ যুৱ পৰিষদৰ সভা সামৰি তেওঁ হাজাদিচাৰ নাবলাইদিচা গাওঁৰ নিজ  ঘৰত শুৱলৈ যোৱাৰ সময়ত ৰাতি দুই মান বজাত ৫ জনীয়া উগ্ৰপন্থীৰ এটা দলে হাতত এ কে ৪৭ লৈ তেওঁৰ ঘৰৰ দুৱাৰত টুকুৰিয়াইছিল।

এই সংক্ৰান্তত তেওঁ মাইবাঙ আৰক্ষী থানাত এখন এজাহাৰ দাখিল কৰাৰ পিছতে আৰক্ষীয়ে অভিযান আৰম্ভ কৰি অৱশেষত ঘটনাৰ সৈতে জড়িত থকাৰ অভিযোগত অস্ত্ৰসহ ১১ গৰাকী দুৰ্বৃত্তক আটক কৰে।

আৰক্ষী অধীক্ষক প্ৰশান্ত শইকিয়াই উক্ত ১১ গৰাকী লোক এটা ক্ৰিমিনেল গেঙৰ সদস্য বুলি সংবাদমেলত সদৰী কৰে। তেওঁলোকে উগ্ৰপন্থী সংগঠন গঠন কৰাৰ চেষ্টা চলাই আছিল যদিও স্থানীয় ৰাইজৰ সহযোগত আৰক্ষীৰ এই অভিযানে তেওঁলোকৰ পৰিকল্পনা অন্ত পেলাই বুলি তেওঁ লগতে মন্তব্য কৰে।

আজিৰ সংবাদমেলত জিলাখনৰ অতিৰিক্ত আৰক্ষী অধীক্ষকদ্বয় ক্ৰমে প্ৰশান্ত দত্ত, পুষ্প সিঙ আৰু মাইবাঙৰ মহকুমা আৰক্ষী বিষয়া মায়ুঙ্খ কুমাৰ উপস্থিত আছিল।