এমটিভিৰ ছুপাৰ ফাইট লীগত উজলিছে অসম সন্তান ভৱজিত
নিজস্ব সাধনা আৰু কঠিন পৰিশ্ৰমেৰে ৰাষ্ট্ৰীয় পৰ্যায়ত উজলি উঠিবলৈ সক্ষম হৈছে একৰাগী অসম সন্তান।
বজালী মহকুমাৰ পাটাচাৰকুছিৰ সমীপৰ চৌধুৰীপাৰাৰ যুৱক ভৱজিৎ চৌধুৰীয়ে মুম্বাইত চলি থকা এম টি ভি ছুপাৰ ফাইট লীগত দুৰ্দান্ত প্ৰদৰ্শন আগবঢ়াই ইতিমধ্যে নিজৰ যোগ্যতা প্ৰতিপন্ন কৰিবলৈ সক্ষম হৈছে।
উল্লেখ্য যে ভৱজিৎ চৌধুৰীয়ে মুম্বাইত চলি থকা এম টি ভি ছুপাৰ ফাইট লীগত গুজৰাট ৱাৰিয়াৰ্ছৰ অধিনায়ক হিচাপে প্ৰদৰ্শন আগবঢ়াইছে। ইতিমধ্যে ভৱজিতে ১৭ ফেব্ৰুৱাৰিত তেওঁৰ প্ৰথমখন মেচতে প্ৰতিভাৰ পৰিচয় দি কঠিন প্ৰতিদ্বন্দ্বী তামিল ভেৰনাছক পৰাস্ত কৰিবলৈ সক্ষম হৈছে।
জীৱনৰ বহু ঘাত প্ৰতিঘাত নেওচি ভৱজিতে এতিয়া সাজু হৈছে তেওঁৰ পৰৱৰ্তী মেচলৈ। অহা ৩ মাৰ্চত ইউ পি নাওৱাবাছৰ বিৰুদ্ধে অৱতীৰ্ণ হ’ব ভৱজিৎ। দ্বিতীয় ৰাউণ্ডডৰ এই মেচখনৰ বাবে এতিয়া কঠিন প্ৰস্তুতিত ব্যস্ত আছে খেলুৱৈগৰাকী।
উল্লেখ্য যে ২০১২ চনৰ পৰা কুংফু, টাইকোৱানডো আদিৰ দৰে সমৰকলাৰ সাধনাত পেছাদাৰীভাৱে ব্যস্ত থকা এইগৰাকী খেলুৱৈৱে ইতিমধ্যে দেশৰ ভিন্ন প্ৰতিযোগিতাত ভাগ লৈ বিভিন্ন পদক লাভৰ জৰিয়তে ৰাজ্যখনলৈ সুনাম কঢ়িয়াই আনিবলৈ সক্ষম হৈছিল। ৰাষ্ট্ৰীয় স্তৰৰ এই প্ৰতিযোগিতাত ভৱজিতৰ সফলতা কামনা কৰিছে সকলোৱে।