ভাৰতীয় সেনা আৰু ভাৰতীয় বায়ু সেনাৰ বিৰুদ্ধে পাঁচ বছৰত ১১৬ টা মানৱ অধিকাৰ উলংঘনৰ অভিযোগ

দেশ তথা জনতাৰ নিৰাপত্তাৰ বাবে নিয়োজিত নিৰাপত্তাৰক্ষীৰ দ্বাৰাই সাধাৰণ জনতা নিৰাপত্তাৰ আশংকাত ভোগা কোনো নতুন ঘটনা নহয়। নিৰাপত্তাৰ ৰক্ষাৰ নামত বহুসময়ত নিৰাপত্তাৰক্ষীৰ দ্বাৰা লাঞ্ছনাৰ সন্মুখীন হ’বলগীয়া হয় সাধাৰণ জনতা। এনে ঘটনা বহুসময়ত অৱশ্যে পোহৰলৈ নহাকৈয়ে থাকি যায়।

সোমবাৰে ৰাজ্যসভাত কেন্দ্ৰীয় চৰকাৰে প্ৰদান কৰা বিৱৰণ অনুসৰি ভাৰতীয় সেনা আৰু ভাৰতীয় বায়ু সেনাৰ বিৰুদ্ধে ২০১৭ চনৰ পৰা মানৱ অধিকাৰ উলংঘনৰ মুঠ ১১৬ টা অভিযোগ পোৱা গৈছে।

প্ৰতিৰক্ষা ৰাজ্যিক মন্ত্ৰী অজয় ভট্টই সোমবাৰে প্ৰদান কৰা বিৱৰণৰ তথ্য অনুসৰি এই ১১৬ টা অভিযোগৰে সেনাৰ বিৰুদ্ধে ১০৮ টা অভিযোগ পোৱা গৈছে। আনহাতে ভাৰতীয় বায়ু সেনাৰ বিৰুদ্ধে এই সময়ছোৱাত ৮ টা অভিযোগ উত্থাপিত হৈছে।

মন্ত্ৰীগৰাকীৰ তথ্য অনুসৰি ২০১৭ চনৰ পৰা ২০২২ চনৰ ভিতৰত ভাৰতীয় নৌসেনাৰ বিৰুদ্ধে মানৱ অধিকাৰ উলংঘনৰ কোনো অভিযোগ উত্থাপন হোৱা নাই।

ৰাজ্যসভাত অজয় ভট্টই দাঙি ধৰা তথ্যত দেখুওৱা হৈছে যে ২০১৭ চনত ভাৰতীয় সেনাৰ বিৰুদ্ধে মানৱ অধিকাৰ উলংঘনৰ অভিযোগৰ সংখ্যা আছিল ২৯ টা, আনহাতে ২০১৮ চনত অভিযোগৰ সংখ্যা ৪২ টালৈ বৃদ্ধি পায়।

সেইদৰে ২০১৯, ২০২০, ২০২১ চনত ভাৰতীয় সেনাৰ বিৰুদ্ধে ক্ৰমে ২৬ টা, ৭ টা আৰু ৪ টা মানৱ অধিকাৰ উলংঘনৰ অভিযোগ উত্থাপন হৈছিল।

আনহাতে ভাৰতীয় বায়ু সেনাৰ বিৰুদ্ধে ২০১৭ চনত এটা আৰু ২০১৯ চনত আন এটা অভিযোগ উত্থাপন হৈছিল। ২০২১ আৰু ২০২২ চনত বায়ু সেনাৰ বিৰুদ্ধে তিনিটাকৈ অভিযোগ সন্মুখলৈ আহে বুলি মন্ত্ৰীগৰাকীয়ে কয়।

মন্ত্ৰী ভট্টই লগতে কয় যে ভাৰতীয় সেনাৰ বিৰুদ্ধে মানৱ অধিকাৰ উলংঘনৰ অভিযোগ সমূহ স্থানীয় আৰক্ষী, বিশেষ তদন্ত দল, মানৱ অধিকাৰ আয়োগ, চিবিআই তথা সেনা গোটসমূহৰ উচ্চতম কৰ্তৃপক্ষৰ তদন্তৰ আওতাত পৰে।

মানৱ অধিকাৰ উলংঘনৰ ঘটনাৰ প্ৰতিবেদন দাখিল হ’লে প্ৰতিৰক্ষা মন্ত্ৰালয়ৰ ইণ্টিগ্ৰেটেড মুখ্য কাৰ্যালয় আৰু কমাণ্ডৰ মুখ্য কাৰ্যালয়ক তদন্ত কৰাৰ ক্ষমতা দিয়া হৈছে বুলিও মন্ত্ৰীগৰাকীয়ে লগতে দোহাৰে।

আনহাতে ভাৰতীয় বায়ু সেনাৰ বিৰুদ্ধে উত্থাপিত মানৱ অধিকাৰ উলংঘনৰ অভিযোগ সমূহ প্ৰভোষ্ট মাৰ্শ্বেল (এয়াৰ)ৰ দ্বাৰা তদন্ত কৰা হয়।

সাধাৰণতে সেনাৰ বিৰুদ্ধে মানৱ অধিকাৰ উলংঘনৰ এনে অভিযোগ বহু সময়ত পোহৰলৈ নহাকৈয়ে থাকি যায়। যোৱা পাঁচটা বছৰত সেনাৰ বিৰুদ্ধে যি ১১৬ টা অভিযোগ উত্থাপিত হৈছে বুলি দেখুওৱা হৈছে, প্ৰকৃততে ইয়াৰ সংখ্যা বৃদ্ধি হোৱাৰ যথেষ্ট সম্ভাৱনা আছে।