চকু কপালত উঠিব আপোনাৰ! ৰাজ্যত কিমান নিবনুৱা? ২৬ হাজাৰ পদৰ বিপৰীতে প্ৰায় ১২ লাখৰ আবেদন!

ৰাজ্য চৰকাৰে তৃতীয় আৰু চতুৰ্থ বৰ্গৰ ২৬ হাজাৰ পদৰ বাবে বিজ্ঞাপন প্ৰকাশ কৰিছিল। এই পদৰ বিপৰীতে কিমান লোকে আবেদন কৰিব পাৰে বা ৰাজ্যখনত চাকৰি প্ৰত্যাশী যুৱক-যুৱতী কিমান আছে সেয়া দেখিলে আপোনাৰ চকু কপালত উঠিব।

মুখ্যমন্ত্ৰী ড০ হিমন্ত বিশ্ব শৰ্মাই ২০২২ চনৰ মাৰ্চ মাহৰ ভিতৰত ১ লাখ নিবনুৱা যুৱক-যুৱতীক গণি গণি চাকৰি দিম বুলি প্ৰতিখন নিৰ্বাচনী প্ৰচাৰ সভাত ঘোষণা কৰিছিল।

কিন্তু সেই প্ৰতিশ্ৰুতি সম্পূৰ্ণৰূপে পালন কৰিব নোৱাৰিলেও প্ৰায় ২৩ হাজাৰক আৰক্ষী কনিষ্টবল, শিক্ষককে ধৰি বিভিন্ন বিভাগৰ তৃতীয় চতুৰ্থ বৰ্গত নিযুক্তি দিছিল।

তাৰ পাছত পুনৰ বিজ্ঞাপন প্ৰকাশ কৰাৰ পিছত উন্মোচিত হ’ল ৰাজ্যৰ নিবনুৱা সমস্যাৰ ভয়াৱহ ছবিখন। ২৬ হাজাৰ পদৰ বিপৰীতে মুঠ আবেদনকাৰীৰ সংখ্যা ১১, ৯২,৫০৯ গৰাকী। এক সূত্ৰৰ পৰা লাভ কৰিছো এই তথ্য।

সূত্ৰ অনুসৰি তৃতীয় বৰ্গৰ পদৰ বিপৰীতে মুঠ ৬,৭১,৮০৫ জন প্ৰাৰ্থীয়ে আবেদন কৰিছে। তদুপৰি চতুৰ্থ বৰ্গৰ পদৰ বাবে আবেদন কৰিছে ৪,৪৩,৬৫৫জনে। আনহাতে তৃতীয় বৰ্গৰ অন্তৰ্গত গাড়ীচালক পদৰ বাবে আবেদন কৰিছে আন ৭৭,০৪৯জন চাকৰি প্ৰত্যাশীয়ে।

এমপ্লইমেণ্ট এণ্ড ডাইৰেক্টৰেট অব এমপ্লইমেণ্ট এণ্ড ক্ৰাফছমেন ট্ৰেইনিঙৰ তথ্য অনুসৰি ৰাজ্যত এতিয়া ২২ লাখৰো অধিক নিবনুৱা আছে।

এই লাখ লাখ নিবনুৱাক সংস্থাপনৰ বাবে ৰাজ্য চৰকাৰ বা কেন্দ্ৰীয় চৰকাৰে কি ব্যৱস্থা গ্ৰহণ কৰে সেয়া সময়ত লক্ষ্যণীয় হ’ব।