নিৰাপত্তা বাহিনীৰ তীব্ৰ অভিযানঃ ছত্তীশগড়ত নিহত ১৩ গৰাকী মাওবাদী সদস্য

লোকসভা নিৰ্বাচনৰ প্ৰাকমুহূৰ্তত ছত্তীশগড়ত মাও বিৰোধী অভিযান তীব্ৰতৰ কৰি তুলিছে নিৰাপত্তা বাহিনীয়ে। ৰাজ্যখনত নিৰাপত্তা বাহিনীৰ এক বৃহৎ অভিযানত মঙলবাৰে ১৩ জন মাওবাদী সদস্য নিহত হয়।

আৰক্ষীয়ে জানিবলৈ দিয়া মতে, মঙলবাৰে বিজাপুৰ জিলাৰ এখন দুৰ্গম অৰণ্যত সংঘটিত হয় এই তীব্ৰ সংঘৰ্ষ। প্ৰায় আঠ ঘণ্টা ধৰি চলি থকা এই গুলীচালনাৰ ফলত উত্তেজনা্ময় হৈ পৰে অঞ্চলটো।

সংঘৰ্ষৰ অন্তত সংঘৰ্ষস্থলীৰ পৰা কেইবাটাও ৰাইফল, মেচিনগান, আৰু বৃ্হৎ পৰিমাণৰ গোলাবাৰুদ জব্দ কৰা হৈছে বুলি এগৰাকী উচ্চপ্ৰদস্থ আৰক্ষী বিষয়াই জানিবলৈ দিয়ে।  

নিহত মাওবাদী সদস্যসকলৰ পৰিচয় এতিয়াও নিশ্চিত হোৱা নাই বুলি সদৰী কৰি আৰক্ষী বিষয়াজনে লগতে নিহতসকলৰ ভিতৰত তিনিগৰাকী মহিলা কেডাৰ আছে বুলিও জানিবলৈ দিয়ে।

বিজাপুৰ জিলা ৰিজাৰ্ভ গাৰ্ডৰ নেতৃত্বত চি আৰ পি এফ, এছ টি এফ, আৰু কোব্ৰাৰ দলৰ সহযোগত এই অভিযান চলোৱা হৈছিল বুলি প্ৰকাশ কৰিছে কৰ্তৃপক্ষই।