ইৰানৰ হিট লিষ্টত ট্ৰাম্প, মেলোনী, মেক্ৰনসহ ১৩ বিশ্বনেতা! জাৰি হ’ল মৃত্যু পৰোৱানা

প্ৰাক্তন উচ্চতম নেতা আয়াতুল্লাহ আলী খামেনেইৰ মৃত্যুৰ প্ৰতিশোধ লোৱাৰ হুংকাৰ দিছিল তেওঁৰ পুত্ৰ মোজতবা খামেনেইয়ে। সেই অনুসৰিয়েই এইবাৰ ইৰান প্ৰশাসনে প্ৰক্ৰিয়া আৰম্ভ কৰিছে। খামেনেইৰ হত্যাকাণ্ডৰ সৈতে জড়িত থকাৰ অভিযোগত বিশ্বৰ কেইবাগৰাকীও শীৰ্ষ নেতাৰ বিৰুদ্ধে মৃত্যু পৰোৱানা জাৰি কৰা হৈছে। তেহৰান পৌৰসভাৰ দ্বাৰা প্ৰকাশিত ইৰানৰ এখন বাতৰি কাকতত আমেৰিকা আৰু ইজৰাইলকে ধৰি ইউৰোপৰ কেইবাখনো দেশৰ শীৰ্ষ নেতাৰ ছবি প্ৰকাশ কৰি কোৱা হৈছে যে এইসকল নেতাই খামেনেইৰ মৃত্যুৰ বাবে জগৰীয়া।

ইৰানে প্ৰকাশ কৰা এই বিশ্বনেতাসকলৰ মৃত্যু পৰোৱানাত মুঠ ১৩ গৰাকী নেতাৰ নাম আৰু ছবি অন্তৰ্ভুক্ত কৰা হৈছে। এই হিট লিষ্টত স্থান পোৱা নেতাসকলৰ ভিতৰত আছে আমেৰিকাৰ ৰাষ্ট্ৰপতি ডনাল্ড ট্ৰাম্প, বিদেশ সচিব মাৰ্কো ৰুবিঅ’ আৰু প্ৰতিৰক্ষা সচিব পিট হেগচেথ। ইয়াৰ উপৰিও ইজৰাইলৰ প্ৰধানমন্ত্ৰী বেঞ্জামিন নেতান্যাহু আৰু দেশখনৰ প্ৰতিৰক্ষা বিভাগৰ দুজন শীৰ্ষ বিষয়া ইজৰাইল কাটজ আৰু গিডিয়ন চাৰৰ নামো ইয়াত আছে। এই তালিকাত ব্ৰিটেইনৰ প্ৰধানমন্ত্ৰী কিৰ ষ্টাৰমাৰ, ফ্ৰান্সৰ ৰাষ্ট্ৰপতি ইমানুৱেল মেক্ৰন, ইটালীৰ প্ৰধানমন্ত্ৰী জৰ্জিয়া মেলোনী আৰু জাৰ্মানীৰ চান্সেলৰ ফ্ৰেডৰিক মেৰ্জসহ মুঠ ১৩ গৰাকী নেতাৰ নাম অন্তৰ্ভুক্ত হৈছে। প্ৰকাশিত তালিকাত আমেৰিকাৰ ৰাষ্ট্ৰপতি ডনাল্ড ট্ৰাম্প আৰু ইজৰাইলৰ প্ৰধানমন্ত্ৰী নেতান্যাহুক পোনপটীয়াকৈ বন্দুকৰ লক্ষ্য হিচাপে দেখুওৱা হৈছে আৰু আনসকল নেতাক বন্দীৰ পোছাকত দেখুওৱা হৈছে।

উল্লেখ্য যে চলিত বৰ্ষৰ ২৮ ফেব্ৰুৱাৰীত আমেৰিকা আৰু ইজৰাইলৰ যৌথ আক্ৰমণত ইৰানৰ উচ্চতম নেতা আয়াতুল্লাহ আলী খামেনেইৰ মৃত্যু হৈছিল। শেহতীয়াকৈ তেওঁৰ শেষকৃত্য সম্পন্ন হোৱাৰ পিছতে তেওঁৰ পুত্ৰ মোজতবা খামেনেইয়ে শত্ৰুপক্ষক তীব্ৰ ভাষাৰে সকীয়াই দিছিল। এক লিখিত বাৰ্তাত তেওঁ কয় যে সমগ্ৰ জাতিৰ এটাই দাবী আৰু সেয়া হৈছে প্ৰতিশোধ। তেওঁলোকৰ প্ৰয়াত উচ্চতম নেতাৰ মৃত্যুৰ প্ৰতিশোধ তেওঁলোকে ল‘বই। ইয়াৰ উপৰিও তেওঁ কয় যে জঘন্য অপৰাধী আৰু হত্যাকাৰীৰ হাতত যিসকল নেতা শ্বহীদ হৈছে, তেওঁলোক সকলোৰে তেজৰ প্ৰতিশোধ লোৱাৰ প্ৰতিজ্ঞা কৰা হৈছে। তেওঁলোকে এই লক্ষ্য অৰ্জন কৰিবই আৰু অতি সোনকালে বিশ্বৰ সকলো স্বাধীনতা প্ৰেমী লোক এই পৱিত্ৰ অভিযানৰ অংশীদাৰ হ’ব।

ইৰানৰ ওপৰত হোৱা এই আক্ৰমণৰ ঘটনাৰ বাবে আমেৰিকা আৰু ইজৰাইল পোনপটীয়াকৈ দায়ী যদিও ইৰানৰ দাবী যে এই যুদ্ধত ইউৰোপৰ কেইবাখনো দেশ পৰোক্ষভাৱে জড়িত আছিল। তেহৰানৰ অভিযোগ অনুসৰি ব্ৰিটেইন, ফ্ৰান্স আৰু জাৰ্মানীৰ দৰে দেশসমূহে কেৱল ইৰানৰ সাৰ্বভৌমত্বৰ ওপৰত হোৱা আক্ৰমণৰ গৰিহণা দিয়াই নাছিল, বৰঞ্চ আমেৰিকাৰ সামৰিক বিমানক নিজৰ আকাশমাৰ্গ ব্যৱহাৰৰ অনুমতি দি এই গুপ্তহত্যা আৰু আক্ৰমণৰ ঘটনাত পৰোক্ষভাৱে সহায় কৰিছিল।