বান বিধ্বস্ত ৰাজ্য; ১৭ জনৰ মৃত্যু, সন্ধানহীন ১০০ তকৈও অধিক লোকৰ
অন্ধ্ৰ প্ৰদেশত নেৰানেপেৰা বৰষুণৰ ফলত সৃষ্টি হোৱা বানপানীত ১৭ জন লোকৰ মৃত্যু হোৱাৰ লগতে ১০০ ৰো অধিক লোক সন্ধানহীন হোৱাৰ খবৰ পোৱা গৈছে।
মন্দিৰৰ চহৰ তিৰুপতিত বৃহৎ বানপানীত আৱদ্ধ হৈ পৰিছে শ শ তীৰ্থযাত্ৰী।
চক্ৰ পৰিদৰ্শক সত্যবাবুৱে জানিবলৈ দিয়া মতে, অন্ধ্ৰৰ অনন্তপুৰ জিলাৰ কাদিৰী চহৰত নিশা ধাৰাসাৰ বৰষুণৰ ফলত এটা পুৰণি ৩ মহলীয়া অট্টালিকা খহি পৰাৰ ফলত ৩ টা শিশু আৰু এগৰাকী বৃদ্ধ মহিলাৰ মৃত্যু হয়। বৰ্তমান সময়লৈকে উদ্ধাৰ অভিযান চলি আছে আৰু অট্টালিকাৰ ধ্বংসস্তূপৰ ভিতৰত এতিয়াও ৪ জনৰো অধিক লোক আৱদ্ধ হৈ আছে ।
তিৰুপতিৰ উপকণ্ঠত থকা স্বৰ্ণমুখী নদী বানপানীত প্লাবিত হৈছে আৰু জলাশয়বোৰ উপচি পৰিছে। বানপানীত বহুলোক আবদ্ধ হৈ থকাৰ খবৰ পোৱা গৈছে।
পৰিস্থিতিটো নিয়ন্ত্ৰণ কৰিবলৈ ৰাষ্ট্ৰীয় আৰু ৰাজ্যিক দুৰ্যোগ সাহায্য দল মোতায়েন কৰা হৈছে আৰু উদ্ধাৰ অভিযান পূৰ্ণ গতিত চলি আছে।
বানপানীৰ ফলত বহু ঠাইত ৰাস্তা-ঘাট ক্ষতিগ্ৰস্ত হৈছে আৰু ৰে’ল, পথ আৰু বিমান যাতায়ত ক্ষতিগ্ৰস্ত হৈছে।
ৰাজ্যখনৰ ৰয়ালসীমা অঞ্চল, চিত্তুৰ, কাডাপা, কুৰ্ণুল আৰু অনন্তপুৰ জিলা বানত অত্যধিক প্ৰভাৱিত হৈছে।
বৃহস্পতিবাৰৰ পৰা অবিৰত বৰষুণ হৈ থকাৰ ফলত চেয়ুৰু নদী পানীৰে উপচি পৰিছে। অন্নময় জলসিঞ্চন প্ৰকল্পটোও বানত প্ৰভাৱিত হৈছে।
বানৰ ভয়াৱহতালৈ লক্ষ্য ৰাখি ৰাজ্যখনৰ কাডাপা বিমানবন্দৰ ২৫ নৱেম্বৰলৈকে বন্ধ ঘোষণা কৰা হৈছে।
উল্লেখ্য যে বৰষুণৰ ফলত দক্ষিণ ভাৰতীয় ৰাজ্য তামিলনাডু আৰু কেৰালাতো ব্যাঘাত ঘটিছে। কেৰালাৰ পাথানামথিট্টা জিলাৰ পাম্বা নদীত পানীৰ স্তৰ বৃদ্ধি হোৱাৰ বাবে কাইলৈ পাম্বা আৰু সবৰীমালালৈ তীৰ্থযাত্ৰা নিষিদ্ধ কৰা হৈছে।