আৰু ১৮ মিটাৰৰ ব্যৱধান! কাইলৈ পোহৰ দেখিব পাৰে সুৰঙ্গত আৱদ্ধ ৪১ জন শ্ৰমিকে

উত্তৰাখণ্ডৰ উত্তৰকাশীত সুৰঙ্গত আৱদ্ধ হৈ থকা ৪১ জন শ্ৰমিকে ১২ দিনৰ পাছত হয়তো আজি নিশা বা কাইলৈ দেখিব পাৰে মুকলি আকাশ! উত্তৰাখণ্ড প্ৰশাসনৰ সূত্ৰই ব্যক্ত কৰিছে এই সম্ভাৱনা।

প্ৰশাসনীয় সূত্ৰ অনুসৰি, আৰু প্ৰায় ১৮ মিটাৰ খননৰ পিছতে শ্ৰমিকসকলক উদ্ধাৰৰ সম্ভাৱনা আছে। উত্তৰাখণ্ডৰ পথ আৰু পৰিবহণ বিভাগৰ এগৰাকী জ্যেষ্ঠ বিষয়াই সদৰী কৰা মতে ইতিমধ্যে সুৰঙ্গটোত ৩৯ মিটাৰ ড্ৰিলিং সম্পূৰ্ণ হৈছে।

অনুমান অনুসৰি শ্ৰমিকসকল ৫৭ মিটাৰ ভিতৰলৈ আৱদ্ধ হৈ আছে। গতিকে শ্ৰমিকসকলক উদ্ধাৰৰ বাবে আৰু ১৮ মিটাৰ খনন বাকী আছে বুলি তেওঁ লগতে কয়।

যদি কোনো বাধা আহি নপৰে, তেন্তে আজি ৰাতি বা কাইলৈ পুৱা আকাংক্ষিত খবৰ আহিব পাৰে বুলি তেওঁ লগতে আশা প্ৰকাশ কৰে। অৱশ্যে বাকী থকা অংশৰ খনন যথেষ্ট জটিল হ’ব বুলিও তেওঁ আশংকা ব্যক্ত কৰে।

উল্লেখ্য যে, আৱদ্ধ শ্ৰমিকসকললৈ যোৱা নিশা ইঞ্চি বহল পাইপলাইনৰ জৰিয়তে গৰম আহাৰ প্ৰেৰণ কৰা হৈছিল। এই খাদ্য যাতে সহজে হজম হয়, সেয়া নিশ্চিত কৰাৰ উদ্দেশ্যে চিকিৎসা তত্বাৱধানত খাদ্য প্ৰস্তুত কৰা হৈছিল।

আনহাতে কালি দিনৰ ভাগত প্ৰথমবাৰৰ বাবে পাইপলাইনৰ মাজেৰে সুমুৱাই দিয়া এণ্ডোস্কোপিক ফ্লেক্সি কেমেৰা ব্যৱহাৰ কৰি আৱদ্ধ শ্ৰমিকসকলৰ ছবি বন্দী কৰা হৈছিল।

কেন্দ্ৰ আৰু ৰাজ্য চৰকাৰে শ্ৰমিকসকলক নিৰাপদে পুনৰ ওপৰলৈ অনাৰ বাবে যথাসম্ভৱ সকলো চেষ্টা কৰাৰ প্ৰতিশ্ৰুতি দিছে যদিও তেওঁলোকক উদ্ধাৰৰ বাবে নিৰ্দিষ্ট সময়সীমা দিবলৈ অস্বীকাৰ কৰিছিল।