মাত্ৰ ১২ বছৰ বয়সতে সুখ্যাতিৰে মেট্ৰিকত উত্তীৰ্ণ হ’ল এইগৰাকী মেধাবী ছাত্ৰ

এগৰাকী মাত্ৰ ১২ বছৰীয়া ছাত্ৰই মণিপুৰত এই বৰ্ষৰ মেট্ৰিক উত্তীৰ্ণ হৈ কনিষ্ঠতম ছাত্ৰ হিচাপে পৰিগণিত হৈছে।

ৰাজ্যখনৰ চুৰাচান্দপুৰ জিলাৰ আইজাক পউলাল্লুংমুৱান ভাইফেই মণিপুৰ শিক্ষা বোৰ্ডে অনুষ্ঠিত কৰা ২০২০বৰ্ষৰ দশম শ্ৰেণীৰ শিক্ষান্ত পৰীক্ষাত ৭২শতাংশ নম্বৰ লাভ কৰি উত্তীৰ্ণ হৈছে।

যোৱা বছৰৰ শেষৰফালে তেওঁৰ পিতৃয়ে শিক্ষা বিভাগৰ পৰা অনুমতি বিচাৰি পত্ৰ লিখাৰ পাছত মণিপুৰ মাধ্যমিক শিক্ষা পৰিষদে (বিএছইএম) ইয়াক এটা ‘বিশেষ ঘটনা’ বুলি অভিহিত কৰি মণিপুৰৰ ২০২০বৰ্ষৰ দশম শ্ৰেণীৰ শিক্ষান্ত পৰীক্ষাত তেওঁক অৱতীৰ্ণ হোৱাৰ বাবে অনুমতি দিছিল।

নিয়ম অনুসৰি, মণিপুৰৰ বিএছইএম পৰীক্ষাত অৱতীৰ্ণ হ’বলৈ ছাত্ৰ-ছাত্ৰীয়ে শিক্ষা বৰ্ষৰ ১এপ্ৰিলত ১৫বছৰ সম্পূৰ্ণ কৰা হ’ব লাগিব আৰু তেতিয়াহে তেওঁ এই শিক্ষান্ত পৰীক্ষাত অৱতীৰ্ণ হ’ব পাৰে।

ইম্ফলৰ RIMSৰ ক্লিনিকেল ছাইক’লজি বিভাগৰ দ্বাৰা ছাত্ৰগৰাকীৰ এক মনস্তাত্বিক পৰীক্ষা সম্পন্ন কৰাৰ পাছত তেওঁক অনুমতি দিয়া হৈছিল।

ইয়াত প্ৰকাশ পাইছিল যে ১৪১ আই কিউ (IQ)ৰে তেওঁৰ মন অনন্য সাধাৰণ।

আইজাকে ছাৰ আইজাক নিউটনৰ এগৰাকী অনুৰাগী আৰু নিজকে নিউটনৰ দৰে ভাৱি নিজৰ নামৰ প্ৰথমতে আইজাক  নামটো লিখে।

ছাইক’লজিকেল পৰীক্ষাই দেখুৱাইছে যে আইজাকৰ মানসিক বয়স ১৭বছৰ ৫ মাহ আৰু তেওঁৰ বৌদ্ধিক তথা বিকাশৰ কাৰ্যকলাপ অতি উন্নত।

আইজাক তেওঁৰ ভাই-ভনীসকলৰ ভিতৰত ডাঙৰ আৰু অষ্টম শ্ৰেণীলৈকে তেওঁ মউন্ট অলিভ স্কুলত অধ্যয়ন কৰিছিল।