পুনৰ আৰম্ভ হ’ব নামনি সোৱণশিৰি আৰু দিবাং জলবিদ্যুত প্ৰকল্পৰ কাম : এন এইচ পি চি

এন এইচ পি চিয়ে শুকুৰবাৰে ২০০০ মেগাৱাট ক্ষমতাযুক্ত নামনি সোৱণশিৰি হাইড্ৰ’ পাৱাৰ প্ৰকল্পৰ কাম পুনৰ আৰম্ভ কৰিব বুলি কোৱাৰ লগে লগে ৰাজ্যত ইয়াৰ বিৰুদ্ধে প্ৰতিবাদ সাব্যস্ত হোৱাৰ সম্ভাৱনাই দেখা দিছে।

‘‘প্ৰয়োজনীয় সামগ্ৰী, অভিযন্তা, কৰ্মী সকলো প্ৰকল্প চলি থকা স্থানত উপস্থিত আছে, নদীত জলপৃষ্ঠৰ পৰিমান হ্ৰাস হোৱাৰ লগে লগে প্ৰকল্পৰ কাম পুনৰ আৰম্ভ হ’ব’’।–এন এইছ পি চিৰ চি এম ডি বলৰাজ যোশীয়ে নতুন দিল্লীত এনেদৰে মন্তব্য কৰে।

অলপতে, ৰাষ্ট্ৰীয় সেউজ ন্যায়াধীকৰণে তিনিজনীয়া বিশেষজ্ঞ সমিতিৰ সন্মতিক্ৰমে প্ৰকল্পৰ কাম আগবঢ়াই নিবলৈ নিৰ্দেশ দিছে।

কাম পুনৰ আৰম্ভ হোৱাৰ চাৰি বছৰৰ ভিতৰত প্ৰকল্পৰ কাম সম্পুৰ্ণ হৈ উঠিব বুলি যোশীয়ে কোৱাৰ লগতে প্ৰকল্পৰ কামত বৰ্তমানলৈ ১০,০০০ কোটি টকা খৰছ হৈছে বুলি উল্লেখ কৰে।

আনহাতে, ২৮৮০ মেগাৱাট ক্ষমতাযুক্ত দিবাং মাল্টি পাৰ্পোছ প্ৰকল্পৰ কথা উল্লেখ কৰি যোশীয়ে এন এইছ পি চিয়ে যিমান সোনকালে সম্ভৱ ইয়াৰ কাম আৰম্ভ কৰিব বুলি কয়।

প্ৰকল্পটোৱে অসমৰ বান সমস্যা হ্ৰাস কৰিব বুলিও যোশীয়ে তাৎপৰ্য্যপূৰ্ণ মন্তব্য কৰে।

উল্লেখযোগ্য যে, অলপতে বিত্ত মন্ত্ৰালয়ৰ কেবিনেট কমিটিয়ে দিবাং প্ৰকল্পৰ প্ৰাথমিক কাম-কাজ আৰম্ভ কৰাৰ বাবে ১৬০০ কোটি টকাৰ অনুমোদন জনাইছে।

তাৰোপৰি, ভাৰতে চীন আৰু ভাৰত সীমান্তৰ বিভিন্ন অঞ্চলত ভূগৰ্ভস্থ গুহা আৰু প্ৰাথমিক ভূগৰ্ভস্থ বাংকাৰ নিৰ্মাণ কৰি আছে।

এন এইচ পি চিয়ে ভাৰতীয় সেনা বাহিনীৰ সৈতে হোৱা সহযোগিতা চুক্তি অনুসৰি বিভিন্ন স্থানত এনেধৰণৰ গুহা আৰু বাংকাৰ নিৰ্মাণ কৰি আহিছে বুলি যোশীয়ে কয়।

তেওঁ লগতে কয় যে, প্ৰথম পৰ্যায়ৰ প্ৰকল্পৰ সফৰ সামৰণিৰ অন্তত সীমান্ত অঞ্চলত আৰু অধিক বাংকাৰ নিৰ্মাণ কৰা হ’ব। এই বাংকাৰ বোৰ নিৰাপত্তাৰ দিশৰ প্ৰতি লক্ষ্য ৰাখিয়ে নিৰ্মাণ কৰা হ’ব বুলিও যোশীয়ে উল্লেখ কৰে।