অতি শীঘ্ৰে ত্ৰিপুৰাৰ ১,৪১,৬২৫ লোকলৈ বিদ্যুৎ সংযোগৰ ব্যৱস্থা

প্ৰধানমন্ত্ৰীৰ সৌভাগ্য আঁচনিৰ জৰিয়তে ত্ৰিপুৰাৰ প্ৰায় ১,৪১,৬২৫ লোকক বিদ্যুৎ সংযোগৰ ব্যৱস্থা কৰি দিব কেন্দ্ৰীয় চৰকাৰে।— এই তথ্য প্ৰকাশ কৰিছে কেন্দ্ৰীয় চৰকাৰৰ শক্তি বিভাগৰ ৰাজ্যিক মন্ত্ৰী আৰ কে সিঙে।

অলপতে ত্ৰিপুৰাৰ উপ- মুখ্য মন্ত্ৰী তথা শক্তি মন্ত্ৰী জিষ্ণু দেৱবাৰ্মাই কেন্দ্ৰীয় মন্ত্ৰী গৰাকীক সাক্ষাতৰ সময়ত তেওঁ এই প্ৰতিশ্ৰুতি দিয়ে বুলি জানিব পৰা গৈছে। আনহাতে এই আঁচনি কাৰ্যকৰী কৰাৰ বাবে অতি শীঘ্ৰে পুঁজি মোকলাই দিয়া হ’ব বুলিও প্ৰকাশ কৰে কেন্দ্ৰীয় মন্ত্ৰী গৰাকীয়ে।

কেন্দ্ৰীয় মন্ত্ৰী আৰ কে সিঙে লগতে এই সন্দৰ্ভত বিভাগটোৰ বিষয়াসকলক নিৰ্দেশ দিয়া হৈছে বুলিও প্ৰকাশ কৰে।

আনহাতে এই বৈঠকতে ত্ৰিপুৰাৰ উপ- মুখ্য মন্ত্ৰী গৰাকীয়ে ৰাজ্যবাসীক সকাহ দিয়াৰ উদ্দেশ্যেই অসমৰ বঙাইগাঁও তাপ বিদ্যুৎ প্ৰকল্পৰ পৰা ক্ৰয় কৰা বিদ্যুতৰ মাচুল হ্ৰাস কৰাৰ দাবী উত্থাপন কৰে। লক্ষণীয়ভাৱে কেন্দ্ৰীয় মন্ত্ৰী গৰাকীয়ে এইক্ষেত্ৰত উপযুক্ত ব্যৱস্থা গ্ৰহণৰ অশ্বাস দিয়ে জিষ্ণু দেৱবাৰ্মাক।

আনহাতে একেখন বৈঠকতে দেৱবাৰ্মাই আমবাছাৰ পৰা গণচেৰাৰলৈ থকা ১৩২ কেভি পাৱাৰ লাইনৰ সমস্যাৰ কথাও উত্থাপন কৰে। অৱশ্যে কেন্দ্ৰীয় মন্ত্ৰী সিঙে অগ্ৰাধিকাৰ ভিত্তিত সমস্যা সমূহ সমাধান কৰা হ’ব বুলি আশ্বাস প্ৰদান কৰে বুলি জানিব পৰা গৈছে।