সাৱধান হওক : ৰে’লতেই মৃত্যু ঘটিল ৩০ বছৰীয়া কোভিড আক্ৰান্ত যুৱক

চলন্ত ৰে’লত ৩০ বছৰীয়া এগৰাকী কোভিড আক্ৰান্ত যুৱকৰ মৃত্যু ঘটিছে।

দেওবাৰে পোহৰলৈ আহিছে এই মৰ্মস্পৰ্শী খবৰটো।

ঘটনাৰ বিৱৰণীৰ মতে যোৱা শুকুৰবাৰে আহমদাবাদ-বাৰুৱানী চুপাৰ-এক্সপ্ৰেছ নিজ পত্নী আৰু সন্তানসহ ঘৰ অভিমুখে যাত্ৰা কৰি থাকোতে কোভিড আক্ৰান্ত যুৱকজনৰ মৃত্যু ঘটে বুলি প্ৰকাশ পাইছে।

ৰে’লৱে কৰ্তৃপক্ষই প্ৰকাশ কৰা অনুসৰি যুৱকজন কোভিডত আক্ৰান্ত বুলি ৰে’লৱেই অৱগত হোৱা নাছিল।

মুজাফাপুৰৰ ৰে’লৱেই আৰক্ষী থানাৰ বিষয়া দীনেশ কুমাৰ চাহুৱে কয় যে পত্নী-সন্তানসহ ৰাজেশ কুমাৰ চৌধুৰীয়ে নিজ ঘৰলৈ ওভতি আহি থকাৰ পথতে মৃত্যু হৈছে।

বিষয়াগৰাকীয়ে প্ৰকাশ কৰা অনুসৰি পত্নীয়ে মৃত যুৱকজনৰ কোভিড টেষ্টৰ প্ৰতিবেদন লগত লৈ আহিছিল য’ত কোভিড প’জিটিভ বুলি পোৱা গৈছে।

“চৌধুৰীৰ পত্নীয়ে কোৱা মতে যোৱা ৫ এপ্ৰিলত চুৰাটত যুৱকজনৰ শৰীৰত কোভিড পজিটিভ ধৰা পৰিছিল।” বিষয়াগৰাকীয়ে কয়।

কোভিড পজিটিভ পোৱাৰ পিছতে চিকিৎসকে যুৱকজনক চিকিৎসালয়ত ভৰ্তি হ’বলৈ পৰামৰ্শ দিছিল যদিও তেওঁ সেই পৰামৰ্শ অগ্ৰাহ্য কৰি ঘৰলৈ ওভতি আহিছিল বুলি যুৱকজনৰ পত্নীয়ে প্ৰকাশ কৰিছে।

উল্লেখ্য যে ৰাজেশ কুমাৰ চৌধুৰী চুৰাটস্থিত এটা ব্যক্তিগত প্ৰতিষ্ঠান কৰ্মৰত আছিল।