এসপ্তাহৰ ভিতৰতে ৩০৫খন শিক্ষানুষ্ঠানৰ প্ৰাদেশিকীকৰণ কৰা হ’ব : শিক্ষা মন্ত্ৰী

‘’ৰাজ্য চৰকাৰে আগন্তুক বাজেট অধিৱেশনৰ সময়তে এসপ্তাহৰ ভিতৰত ৩০৫খন ভেন্সাৰ শিক্ষানুষ্ঠানৰ প্ৰাদেশিকীকৰণ কৰিব। ইয়াৰ মাজত আছে ১০৪খন জুনিয়ৰ কলেজ, ১১০খন উচ্চতৰ মাধ্যমিক বিদ্যালয় আৰু ৯১খন উচ্চ মাধ্যমিক বিদ্যালয়।‘—শ্ৰীমন্ত শংকৰদেৱ কলাক্ষেত্ৰত শুকুৰবাৰে এই কথা ঘোষণা কৰে ৰাজ্যৰ শিক্ষা মন্ত্ৰী সিদ্ধাৰ্থ ভট্টাচাৰ্যই।

গুৱাহাটীৰ শ্ৰীমন্ত শংকৰদেৱ কলাক্ষেত্ৰৰ আন্তৰ্জাতিক প্ৰেক্ষাগৃহত ২০১৯’ শিক্ষা বৰ্ষৰ বিনামূলীয়া পাঠ্যপুথি বিতৰণ আৰু অসম উচ্চতৰ মাধ্যমিক শিক্ষা সংসদৰ শৈক্ষিক কেলেণ্ডাৰ উন্মোচন তথা নৱম-দশম শ্ৰেণীৰ নতুন দ্ৰুতপাঠ ‘বৈচিত্ৰ্যময় অসম’ উন্মোচন উপলক্ষে আয়োজিত অসম চৰকাৰৰ শিক্ষা বিভাগৰ শৈক্ষিক উত্তৰণ শীৰ্ষক কাৰ্যসূচীত শিক্ষামন্ত্ৰী সিদ্ধাৰ্থ ভট্টাচাৰ্যই এই ঘোষণা কৰে।

শিক্ষা মন্ত্ৰী ভট্টাচাৰ্যই কয়, ‘’সংশ্লিষ্ট শিক্ষানুষ্ঠাসমূহৰ প্ৰাদেশিকীকৰণৰ কাম ইতিমধ্যে সম্পূৰ্ণ হৈ উঠিছে। অহা ২৮ জানুৱাৰিৰ পৰা আৰম্ভ হ’বলগীয়া বিধানসভাৰ বাজেট অধিৱেশনৰ সময়তে এই শিক্ষানুষ্ঠানসমূহৰ প্ৰাদেশিকীকৰণৰ কথা আনুষ্ঠানিকভাৱে ঘোষণা কৰা হ’ব।‘’

আনহাতে, শিক্ষা মন্ত্ৰীয়ে জানিবলৈ দিয়ে যে ৰাজ্য চৰকাৰে ৰাজ্যৰ চৰকাৰী বিদ্যালয়ত ‘ক’ শ্ৰেণীৰ পৰা অষ্টম শ্ৰেণীলৈকে অধ্যয়ন কৰা ৪৮ লাখ ৬৪ হাজাৰ ৩৯১গৰাকী ছাত্ৰ-ছাত্ৰীলৈ ইতিমধ্যে ২ কোটি ৯ লাখ ৫৭ হাজাৰ ৫৬৪খন কিতাপ ছপা কৰি বিতৰণৰ বাবে প্ৰেৰণ কৰিছে।

ইপিনে, এইবাৰৰ পৰা নৱম-দশম শ্ৰেণীৰ বাবে ‘বৈচিত্ৰ্যময় অসম’ নামৰ এখন নতুন দ্ৰুতপাঠ আৰম্ভ কৰা হৈছে। মন্ত্ৰী ভট্টাচাৰ্যই কয় যে কিতাপখন কেৱল ছাত্ৰ-ছাত্ৰীয়েই নহয়, অভিভাৱক, সাংবাদিক, বুদ্ধিজীৱীসকলেও পঢ়িব লাগে।

প্ৰাদেশিকীকৰণ সন্দৰ্ভত শিক্ষা মন্ত্ৰী কৰা ঘোষণাই অপ্ৰাদেশীকৃত বিদ্যালয়ৰ বাবে এক সুখৱৰ কঢ়িয়াই আনিছে যদিও বাকী অপ্ৰাদেশিকৃত হৈ থকা বহু বিদ্যালয়ে শিক্ষা মন্ত্ৰীৰ পৰা তেওঁলোকৰ বিদ্যালয়সমূহকলৈ চৰকাৰৰ স্থিতিৰ বিষয়েও জানিব বিচাৰে।

উল্লেখ্য যে, শুকুৰবাৰৰ শৈক্ষিক উত্তৰণ কাৰ্যসূচীত শিক্ষা বিভাগৰ ৰাজ্যিক মন্ত্ৰী পল্লৱলোচন দাস, অসম ৰাজ্যিক পাঠ্যপুথি প্ৰণয়ন আৰু প্ৰকাশন নিগমৰ অধ্যক্ষ ৰাজেন বৰঠাকুৰো উপস্থিত থাকে।