ডিব্ৰুগড়ত ভয়ংকৰ ঘটনা: বিয়াৰ প্ৰস্তাৱ নাকচ কৰাৰ বাবেই যুৱতীক এচিড আক্ৰমণ

দিল্লী অথবা উত্তৰপ্ৰদেশৰ দৰে ৰাজ্যত এচিড আক্ৰমণৰ ঘটনা তেনেই সাধাৰণ ঘটনা হৈ পৰিছে যদিও অসমত এনে ঘটনা কাচিৎহে ঘটিছিল।

শেহতীয়াকৈ ডিব্ৰুগড়ত এগৰাকী যুৱতীক বিয়াৰ প্ৰস্তাৱ প্ৰত্যাখ্যান কৰাৰ বাবেই  এজন লোকে এচিড নিক্ষেপ কৰাৰ ঘটনাই তীব্ৰ প্ৰতিক্ৰিয়াৰ সৃষ্টি কৰিছে।

ঘটনাটো সংঘটিত হৈছে ডিব্ৰুগড়ৰৰ আমোলাপট্টিৰ মিৰ্জাবাগ নামৰ অঞ্চলটোত।

কালি সন্ধিয়া ডিব্ৰুগড়ৰ ছোহাম শ্বপিত কাম কৰা ৩৩ বছৰীয়া  যুৱতীগৰাকীয়ে কামৰ পৰা উভতি অহাৰ সময়তে পথৰ দাঁতিত পূৰ্বৰে পৰা ৰৈ থকা লোক জনে যুৱতীগৰাকীক লক্ষ্য কৰি এচিড নিক্ষেপ কৰে।

ফলত যুৱতীগৰাকীৰ শৰীৰৰ কেইবা ঠাইতো গুৰুতৰ জখম হয়।

লগে লগে যুৱতীগৰাকীক স্থানীয় লোকে চিকিৎসাৰ ব্যৱস্থা কৰে। ইপিনে ঘটনা সংঘটিত কৰিয়েই লোক জনে সেই ঠাইৰ পৰা পলায়ন কৰে।

পিছত যুৱতী গৰাকীৰ অভিযোগৰ ভিত্তিত ডিব্ৰুগড় থানাৰ ভাৰপ্ৰাপ্ত আৰক্ষী বিষয়া ৰাজীৱ শইকীয়াৰ নেতৃত্বত যোৱা এটা দলে  এচিড আক্ৰমণ সংঘটিত কৰা লোক জনক গ্ৰেপ্তাৰ কৰিবলৈ সক্ষম হয়।

আৰক্ষীয়ে গ্ৰেপ্তাৰ কৰা লোক জনৰ নাম বুদ্ধদেৱ দাস বুলি জানিব পৰা গৈছে।

৫০ বছৰীয়া বুদ্ধদেৱ দাসে বহু দিনৰে পৰা যুৱতীগৰাকীক বিয়াৰ বাবে হেঁচা দি আহিছিল।

যুৱতীগৰাকতীয়ে বিয়াত বহিবলৈ অমান্তি হোৱাৰ বাবেই লোক জনে যুৱতী গৰাকীক এচিড আক্ৰমণ কৰে বুলি সন্দেহ কৰা হৈছে।