আজিৰে পৰা ৰাজ্যৰ ৩৭.১ লাখ মহিলাই লাভ কৰিব অৰুণোদয়ৰ ধন, বানপীড়িতৰ বাবে দুগুণ সাহায্য

১ আগষ্টৰ পৰা অসম চৰকাৰে ৰাজ্যৰ প্ৰায় ৩৭.১ লাখ মহিলালৈ প্ৰদান কৰিব অৰুণোদয় আঁচনিৰ ধন। মুখ্যমন্ত্ৰী হিমন্ত বিশ্ব শৰ্মাই ঘোষণা কৰা অনুসৰি প্ৰতিগৰাকী যোগ্য হিতাধিকাৰী মহিলাই নিজৰ বেংক একাউণ্টত প্ৰত্যক্ষ লাভালাভ হস্তান্তৰ ব্যৱস্থাৰ জৰিয়তে মাহিলী ১২৫০ টকাকৈ লাভ কৰিব। এই ধন আধাৰ কাৰ্ডৰ সৈতে সংযুক্ত বেংক একাউণ্টত পোনপটীয়াকৈ সোমাব।

বৃহস্পতিবাৰে সংবাদ মাধ্যমক সম্বোধন কৰি মুখ্যমন্ত্ৰীগৰাকীয়ে কয় যে শেহতীয়াকৈ বানপানীৰ ফলত ক্ষতিগ্ৰস্ত হোৱা পৰিয়ালসমূহক চৰকাৰে অতিৰিক্ত আৰ্থিক সাহায্য প্ৰদান কৰাৰ সিদ্ধান্ত লৈছে। শিৱসাগৰ, চৰাইদেউ, যোৰহাট আৰু গোলাঘাট জিলাৰ বানপীড়িত অৰুণোদয় হিতাধিকাৰীসকলে এইবেলি দুগুণ অৰ্থাৎ ২৫০০ টকাকৈ লাভ কৰিব। হিতাধিকাৰীসকলক নথিপত্ৰ আৰু ধন লাভ কৰাত সহায় কৰিবলৈ অৰুণোদয় সহায়কসকলকো নিয়োজিত কৰা হ’ব বুলি তেওঁ জানিবলৈ দিয়ে।

আগষ্ট মাহটোক ৰাজ্যখনৰ সমাজ কল্যাণমূলক কাম-কাজৰ বাবে এক গুৰুত্বপূৰ্ণ মাহ হিচাপে অভিহিত কৰি মুখ্যমন্ত্ৰীয়ে অনাগত দিনত আন কেইবাখনো আঁচনি মুকলি কৰাৰ কথা প্ৰকাশ কৰে। উচ্চ শিক্ষা গ্ৰহণ কৰি থকা শিক্ষাৰ্থীসকলক আৰ্থিক সাহায্য প্ৰদানৰ উদ্দেশ্যে আগষ্ট মাহৰ প্ৰথম সপ্তাহতে নিযুত মইনা আৰু নিযুত বাবু আঁচনিৰ আবেদন পত্ৰ বিতৰণ কৰা হ’ব। চৰকাৰৰ মতে, এই আঁচনিৰ জৰিয়তে পাঁচ লাখৰো অধিক ছাত্ৰ-ছাত্ৰী উপকৃত হ’ব আৰু অক্টোবৰ মাহত প্ৰায় ৩০০ কোটি টকাৰ আৰ্থিক সাহায্য প্ৰদান কৰা হ’ব।

আন এক গুৰুত্বপূৰ্ণ ঘোষণা অনুসৰি অহা ১০ আগষ্টৰ পৰা ৰাজ্যত ৰেচন ব্যৱস্থা পুনৰ আৰম্ভ হ’ব। এই আঁচনিৰ অধীনত ৭০ লাখৰো অধিক হিতাধিকাৰীয়ে ৰেচন কাৰ্ডৰ জৰিয়তে মাত্ৰ ১০০ টকাৰ বিনিময়ত বিনামূলীয়া খাদ্যশস্যৰ লগতে ১ কিলোগ্ৰাম মচুৰ দাইল আৰু ১ কিলোগ্ৰাম চেনি লাভ কৰিব। জিলা উপায়ুক্তসকলৰ সৈতে হোৱা এখন ভিডিঅ’ কনফাৰেন্সত অংশগ্ৰহণ কৰি মুখ্যমন্ত্ৰীয়ে সকলো যোগ্য ব্যক্তিয়ে যাতে কোনো ধৰণৰ অসুবিধা নোহোৱাকৈ এই আঁচনিসমূহৰ সুবিধা লাভ কৰিব পাৰে, তাৰ বাবে নিৰ্দেশ দিয়ে। ২০২০ চনত আৰম্ভ হোৱা এই অৰুণোদয় আঁচনিয়ে বৰ্তমান ৰাজ্যৰ দৰিদ্ৰ পৰিয়ালসমূহৰ আৰ্থিক নিৰাপত্তা সুনিশ্চিত কৰাত এক অতি গুৰুত্বপূৰ্ণ ভূমিকা গ্ৰহণ কৰিছে।